خیبرپختونخواہ سے پی ٹی آئی کی رکن اسمبلی نرگس علی کامسلم لیگ (ق) میں شمولیت کا اعلان

پاکستانیت کا جذبہ رکھنے والوں کیلئے دروازے کھلے ہیں، مسلم لیگ دن بدن مضبوط اور فعال ہو رہی ہے‘ چودھری شجاعت حسین

جمعہ 11 مئی 2018 19:27

خیبرپختونخواہ سے پی ٹی آئی کی رکن اسمبلی نرگس علی کامسلم لیگ (ق) میں ..

اسلام آباد/لاہور(اُردو پوائنٹ اخبارتازہ ترین - این این آئی۔ 11 مئی2018ء) پاکستان مسلم لیگ کے صدر و سابق وزیراعظم چودھری شجاعت حسین اور سیکرٹری جنرل طارق بشیر چیمہ سے پاکستان تحریک انصاف کی رکن خیبرپختونخواہ اسمبلی محترمہ نرگس علی نے ان کی رہائش گاہ پر ملاقات کی اور پاکستان مسلم لیگ میں شمولیت کا اعلان کیا۔ نرگس علی کا تعلق پشاور سے ہے۔

اس موقع پر پاکستان مسلم لیگ خیبرپختونخواہ کے صدر محبوب اللہ جان اور خواتین ونگ کی صدر محترمہ فرخ خان بھی موجود تھیں۔ چودھری شجاعت حسین نے محترمہ نرگس علی کی پاکستان مسلم لیگ میں شمولیت کا خیر مقدم کرتے ہوئے اسے خوش آئند قرار دیا۔ انہوں نے کہا کہ ہم نے ہمیشہ نیک نیتی سے پاکستان اور عوام کی خدمت کی ہے، کر رہے ہیں اور انشاء اللہ آئندہ بھی کرتے رہیں گے، ہم پاکستانیت کا جذبہ اور مسلم لیگ کا ذہن رکھنے والوں کو ایک پلیٹ فارم پر متحد کرنا چاہتے ہیں تاکہ ملک و قوم کو درپیش مسائل کے حل کیلئے موثر کردار ادا کیا جائے اس مقصد کیلئے ہمارے دروازے کھلے ہیں۔

(جاری ہے)

انہوں نے اس بات پر مسرت کا اظہار کیا کہ خیبرپختونخواہ میں پاکستان مسلم لیگ دن بدن فعال اور مضبوط ہو رہی ہے۔ محترمہ نرگس علی نے کہا کہ وہ ماضی میں پاکستان مسلم لیگ کی عوامی خدمات اور خلوص سے متاثر ہو کر اس میں شامل ہو رہی ہیں۔