سعودی خواتین کے لیے ٹریفک کے قواعد و ضوابط کے حوالے سے تربیتی پروگرام اور آگاہی لیکچروں کا انقعاد

ریاض (اُردو پوائنٹ اخبارتازہ ترین۔ 27 اپریل2018ء) سعودی عرب کے مشرقی صوبے میں مقامی خواتین کے لیے ٹریفک سیفٹی کے قواعد و ضوابط کے حوالے سے تربیتی پروگراموں اور آگاہی لیکچروں کا انقعاد کیا گیا ہے جس میں ریاست بھر سے خواتین ذوق و شوق سے شریک ہو رہی ہیں۔ اس تر بیتی پروگرام کا انقعاد "میری ڈرائیونگ میرا عزم "کے نام سے کیا گیا ہے ۔ اس تر بیتی پروگرام کے دوران منعقد لیکچروں میں ٹریفک قوانین پر اور سڑک پر حفاظت اور سلامتی کو یقینی بنانے کی اہمیت پر روشنی ڈالی گئی تھی ۔

(جاری ہے)

اس دوران خواتین کو فرضی ڈرائیونگ سیٹ پر بٹھا کر گاڑی چلانے کے طریقے کار سے بھی روشناس کرایا گیا ۔ سعودی عرب کے مشرقی صوبے کے گورنر کی اہلیہ نے مقامی میڈیا سے بات کرتے ہوئے کہا کہ جیسے جیسے یکم جون کی تاریخ قریب آ رہی ہے سعودی خواتین میں ڈرائیونگ کی ذمہ داری کو نبھانے کے لیے جوش و خروش بڑھتا جا رہا ہے ۔ انہوں نے مزید کہا کہ سعودی خواتین گھر کے ساتھ ساتھ ڈرائیونگ کی ذمہ داریاں بھی پوری کرنے کے لیے تیار ہیں ، جسکے لیے وہ نہایت خوش نظر آ رہی ہیں ۔