گوناگوں بیماریوں میں مبتلا 7سالہ بہادر برطانوی بچے کی5اعضاء کی کامیاب پیوندکاری

پیچیدہ اور صبر آزما آپریشن 10گھنٹے جاری رہا،گذشتہ 20سال میں اسپتال کا پیچیدہ اور نازک آپریشن قرار، اسپتال ذرائع

جمعرات 26 اپریل 2018 23:31

گوناگوں بیماریوں میں مبتلا 7سالہ بہادر برطانوی بچے کی5اعضاء کی کامیاب ..
برمنگھم(اُردو پوائنٹ اخبارتازہ ترین - آئی این پی۔ 26 اپریل2018ء) برطانیہ میں گوناگوں بیماریوں میں مبتلا 7سالہ بہادر بچے کے 5اعضاء کی کامیاب پیوندکاری کر لی گئی، پیچیدہ اور صبر آزما آپریشن 10گھنٹے تک جاری رہا،گزشتہ 20سال کے دوران یہ اس اسپتال میں کیا جانے والاسب سے پیچیدہ اور نازک آپریشن تھا۔ غیر ملکی میڈیا کے مطابق مقامی اسپتال میں ایک انتہائی باہمت لیکن صرف 7سال کی عمر والے بچے کا بڑا چرچا ہے جو گوناگوں بیماریوں میں مبتلاتھا لیکن اس نے ہمت نہ ہارنے کی قسم کھا رکھی تھی۔

حد یہ کہ اس کم عمری میں اس کے 5اعضاء کی پیوند کاری ہوئی اور یہ پیچیدہ اور صبر آزما آپریشن 10گھنٹے تک جاری رہاتھا۔ کہا جاتا ہے کہ یہ بچہ خون کی کمی اور پیشاب کی نالیوں میں انفیکشن کا شکار تھا۔

(جاری ہے)

حد یہ کہ اسکے لئے کھانا پینا تک مشکل ہوگیا تھا اور اسے ٹیوب کے ذریعے غذا دی جاتی تھی۔ اتنی ساری بیماریوں کو پالنے والا بچہ یہ ظاہر ہی نہیں ہونے دیتا تھا کہ وہ اتنا بیمار ہے لیکن جب امراض کی پردہ داری اس کے لئے بالکل ناممکن ہوگئی اور والدین بھی اسکی بگڑتی حالت کو دیکھ کر پریشان ہوگئے اور اسے مقامی اسپتال میں لے گئے جہاں ڈاکٹروں نے اسے 4ہفتے تک اپنے زیر معائنہ رکھا۔

پھر 10گھنٹے کا یہ پیچید ہ اورطویل ترین آپریشن کرنے کے بعد اسے مختلف ادویہ دیکر اسپتال سے فارغ کردیا ہے۔ کہا جاتا ہے کہ اسے جتنے اعضاء لگائے گئے ہیں وہ مختلف عطیہ دہندگان نے دیئے ہیں۔ جس کے لئے اسکی ماں کیٹی فری اسٹون بیحد مشکور ہے۔ اسپتال ذرائع کا کہناہے کہ گزشتہ 20سال کے دوران یہ اس اسپتال میں کیا جانے والاسب سے پیچیدہ اور نازک آپریشن تھا۔ ماں کا کہناہے کہ ہم عطیہ دہندگان کا صرف شکریہ ہی ادا کرسکتے ہیں مگر شکریہ سے کام نہیں چلتا۔ وہ زندگی بھر ان کی ممنون و مشکور رہیگی اور صحتیابی کے بعد بچہ بھی ان لوگوں کو ہمیشہ یاد رکھے گا۔

متعلقہ عنوان :