عثمان ڈار نے خواجہ آصف کو بتا دیا کہ شرم کیا ہوتی ہے، حیا کیا ہوتی ہے ،ْفواد چوہدری

عدالتی فیصلے سے ہمارے 29 اپریل کے جلسے کو ایک نئی تحریک مل گئی ،ْ رہنما پی ٹی آئی

جمعرات 26 اپریل 2018 16:30

اسلام آباد (اُردو پوائنٹ اخبارتازہ ترین - این این آئی۔ 26 اپریل2018ء) پاکستان تحریک انصاف کے رہنما فواد چوہدری نے کہا ہے کہ اسلام آباد ہائی کورٹ کے فیصلے سے واضح رہے کہ عثمان ڈار نے خواجہ آصف کو بتادیا کہ شرم کیا ہوتی ہے اور حیا کیا ہوتی ہے۔

(جاری ہے)

وزیرخارجہ خواجہ آصف کی نااہلی کے فیصلے کے بعد میڈیا نمائندوں سے بات چیت کرتے ہوئے فواد چوہدری نے کہاکہ اقامہ باہر رکھنے کا صرف ایک مقصد بینک اکاؤنٹ کھولنا ہوتا ہے تاکہ پاکستان سے پیسے باہر منتقل کیے جاسکیں۔

انہوں نے کہا کہ فیصلہ پاکستان کے عوام اور تحریک انصاف کی بہت بڑی کامیابی ہے اور اس سے ہمارے 29 اپریل کے جلسے کو ایک نئی تحریک مل گئی۔تحریک انصاف کے ترجمان نے کہاکہ آئین کے آرٹیکل 62 (ون) (ایف) کے تحت نااہلی تاحیات ہوتی ہے اور اسی لیے خواجہ آصف کی نااہلی بھی تاحیات ہے اور سیالکوٹ کے لوگوں کو ایک عرصے بعد نجات ملی ہے۔