اسلام آباد ہائی کورٹ نے اقامہ کیس میں وزیر خارجہ خواجہ محمد آصف کو پارلیمنٹ کی رکنیت کیلئے نااہل قرار دیدیا

جمعرات 26 اپریل 2018 16:10

اسلام آباد ۔ (اُردو پوائنٹ اخبارتازہ ترین - اے پی پی۔ 26 اپریل2018ء) اسلام آباد ہائی کورٹ نے اقامہ کیس میں وزیر خارجہ خواجہ محمد آصف کو پارلیمنٹ کی رکنیت کیلئے نااہل قرار دیدیا ہے۔ جمعرات کو جسٹس اطہر من الله کی سربراہی میں اسلام آباد ہائی کورٹ کے تین رکنی بنچ نے 10 اپریل کو محفوظ کیا گیا فیصلہ سنایا۔ فیصلہ جسٹس اطہر من الله نے پڑھ کر سنایا۔

(جاری ہے)

تحریک انصاف کے سیالکوٹ سے سابق امیدوار عثمان ڈار نے اسلام آباد ہائی کورٹ میں خواجہ محمد آصف کے خلاف درخواست دائر کی تھی جس میں انہوں نے مؤقف اختیار کیا تھا کہ وزیر خارجہ خواجہ محمد آصف نے اپنے کاغذات نامزدگی فارم میں تمام اثاثے اور غیرملکی اقامہ ظاہر نہیں کیا اس لئے انہیں نااہل قرار دیا جائے۔ عثمان ڈار کی درخواست پر پہلے جسٹس عامر فاروق کی سربراہی میں تین رکنی بنچ نے سماعت کی تاہم بعد ازاں جسٹس میاں گل حسن اورنگزیب کی طرف سے معذرت کے بعد جسٹس اطہر من الله کی سربراہی میں نیا بنچ تشکیل دیا گیا جس نے روزانہ کی بنیاد پر کیس کی سماعت کی۔ فریقین کے دلائل سننے کے بعد 10 اپریل کو فیصلہ محفوظ کر لیا گیا تھا جو جمعرات کو سنایا گیا۔