یمنی حوثیوں نے تیل بردار 19 جہاز یرغمال بنا لیی: سعودی سفیر کی تصدیق

اتوار 22 اپریل 2018 23:00

صنعائ(اُردو پوائنٹ اخبارتازہ ترین - آن لائن۔ 22 اپریل2018ء) یمن میں متعیّن سعودی سفیر محمد آل جابر نے اس امر کی تصدیق کی ہے کہ حوثی شیعہ باغیوں نے تیل بردار انیس جہازوں کو روک رکھا ہے اور وہ انھیں الحدیدہ کی بندر گاہ میں داخل نہیں ہونے دے رہے ہیں۔آل جابر نے ایک ٹویٹ میں لکھا ہے کہ ’’ ایران کے حمایت یافتہ حوثی شیعہ باغیوں نے تیل بردار 19 جہازوں کو اپنے زیر قبضہ علاقے رمی المخطاف میں روک رکھا ہے اور وہ انھیں الحدیدہ کی بندر گاہ میں داخل ہونے سے روک رہے ہیں۔

ان کی اس حرکت پر یمن کے جامع انسانی امدادی مرکز کو گہری تشویش لاحق ہے‘‘۔

(جاری ہے)

واضح رہے کہ حوثی جنگجوؤں نے تین اپریل کو الحدیدہ کی بندرگاہ کے مغرب میں بحیرہ احمر کے بین الاقوامی پانیوں میں سعودی عرب کے ایک آئیل ٹینکر پر حملہ کیا تھا۔سعودی عرب کی قیادت میں عرب اتحادی فوج کے ترجمان کرنل ترکی المالکی نے تب ایک بیان میں بتایا تھا کہ اتحاد کے ایک جنگی بحری جہاز نے فوری طور پر مداخلت کرکے حوثی جنگجوؤں کے حملے کی اس کوشش کو ناکام بنا دیا تھا۔یمن کے مغرب میں بحیرہ احمر پر واقع الحدیدہ کی بندرگاہ پر حوثی شیعہ باغیوں کا کنٹرول ہے۔بیرون ملک سے یمن میں انسانی امداد لے کر آنے والے بحری جہاز اور تیل بردار ٹینکر اسی بندرگاہ پر لنگر انداز ہوتے ہیں۔