مقبوضہ کشمیر ، بھارتی پولیس نے آسیہ اندرابی کو دیگر چار ساتھیوںکے ہمراہ گرفتار کرلیا

ہفتہ 21 اپریل 2018 12:20

سرینگر ۔ (اُردو پوائنٹ اخبارتازہ ترین - اے پی پی۔ 21 اپریل2018ء) مقبوضہ کشمیر میں بھارتی پولیس نے دختران ملت کی چیئرپرسن آسیہ اندرابی کو اپنی چار ساتھیوں کے ہمراہ ضلع اسلام آباد میں گرفتار کر لیا۔ کشمیر میڈیاسروس کے مطابق پولیس نے آسیہ اندرابی ، فہمیدہ صوفی ، ناہیدہ نسرین اور دختران ملت کی ایک کارکن کو اسلام آباد کے علاقے آنچی ڈورہ میں ایک گھر سے گرفتار کیا ۔

(جاری ہے)

انہیں گرفتاری کے بعد اسلام آباد کے صدر تھانے میں نظر بند کر دیاگیا۔دخترا ن ملت کی ایک کارکن نے اسلام آباد میں ذرائع ابلاغ کے نمائندوں کو بتایا کہ بھارتی پولیس کی کم از کم پندرہ گاڑیوں نے گھرمیں داخل ہونے سے پہلے پورے علاقے کو محاصر ے میں لے لیا ۔ انہوں نے کہا کہ علاقے کے لوگ پولیس کی بھاری نفری کو دیکھ کو خوف زدہ ہو گئے ۔ پارٹی کارکن نے کہا کہ آسیہ اندرابی آنچی ڈورہ میں اپنے ایک رشتہ دار کے ہاں آئی تھیں۔