لاہور ہائیکورٹ نے چیئرمین لاہوربورڈکے عدالتی احکامات پر عمل درآمد سے متعلق زبانی بیان کو مسترد کر دیا

جمعہ 20 اپریل 2018 19:19

لاہور۔20 اپریل(اُردو پوائنٹ اخبارتازہ ترین - اے پی پی۔ 20 اپریل2018ء) لاہور ہائیکورٹ نے چئیرمین بورڈ آف انٹرمیڈیٹ اینڈ سیکنڈری ایجوکیشن لاہورکے عدالتی احکامات پر عمل درآمد سے متعلق زبانی بیان کو مسترد کر دیا اور ہدایت کی کہ عدالتی احکامات پر عملدرآمد رپورٹ بذریعہ درخواست داخل کیا جائے۔

(جاری ہے)

لاہور ہائیکورٹ کے جسٹس شجاعت علی خان نے عبدالشکور اور دیگر کی درخواستوں پر سماعت کی جس میں عدالتی حکم کے باوجود بورڈ آف انٹرمیڈیٹ اینڈ سیکنڈری ایجوکیشن میں درجہ ایک سے گیارہ کے ملازمین کو نوکریوں پر مستقل نہ کرنے کے اقدام کو چیلنج کیا گیا ہے عدالتی حکم پر چئیرمین بورڈ آف انٹرمیڈیٹ اینڈ سیکنڈری عدالت میں پیش ہوئے اور موقف اختیار کیا کہ عدالتی حکم پر تمام ملازمین کو مستقل کر دیا گیا جس پر عدالت نے چئیرمین بورڈ کا زبانی بیان مسترد کردیا اور ہدایت کی کہ عدالتی حکم پر عملدرآمد رپورٹ بذریعہ درخواست ہائیکورٹ داخل کی جائے جس کی کاپی درخواستگزار کو بھی فراہم کی جائے عدالت نے درخواستگزار کے وکیل سے کہا کہ وہ عدالتی احکامات پر عملدرآمد رپورٹ کاجائزہ لیں اور ضروری سمجھیں تو اس پر اعتراضات داخل کریں عدالت نے چئیرمین بورڈ کی آئندہ سماعت پر حاضری کے لیے استثنٰی کی درخواست بھی مسترد کردی۔