حیدر آباد بائی پاس میں ٹریفک حادثہ، 4 افراد جاں بحق، 25 زخمی

پیر 16 اپریل 2018 15:29

حیدر آباد (اُردو پوائنٹ اخبارتازہ ترین - این این آئی۔ 16 اپریل2018ء) سندھ کے ضلع ماتلی میں حیدرآباد بائی پاس میں مسافر کوسٹر اور ٹریکٹر ٹرالی کے درمیان تصادم کے نتیجے میں کم ازکم 4 افراد جاں بحق اور 25 زخمی ہوگئے۔پولیس کے مطابق ٹریفک حادثہ ماتلی کے علاقے حیدر بائی پاس میں پیش آیا۔ٹریفک حادثہ علاقے میں جاری ترقیاتی کام کے باعث پیش آیا جہاں گاڑیوں کو گزرنے کے لیے زیرتعمیر سڑک کے ساتھ مختصر اور خطرناک راستہ بنایا گیا تھا۔

(جاری ہے)

حادثے میں جاں بحق ہونے والے افراد کی شناخت 30 سالہ مادھوری، 10 سالہ ندیم مگسی، 70 سالہ خموں ملاح اور 40 سالہ مومل مگسی کے نام سے ہوئی۔زخمی ہونے والے 25 افراد کو فوری طبی امداد کیلئے تعلقہ ہسپتال ماتلی منتقل کردیا گیا جہاں 15 شدید زخمیوں کو مزید علاج کے لیے حیدر آباد بھیج دیا گیا۔حیدر آباد میں موجود ہسپتال ذرائع کے مطابق 15 زخمیوں میں سے 8 کی حالت تشویش ناک ہے۔ماتلی پولیس کے ایس ایچ او حاکم علی جلبانی کا کہنا تھا کہ حادثے کی شکار دونوں گاڑیوں کو ضبط کرلیا گیا ہے تاہم دونوں ڈرائیور جائے وقوع سے فرار ہونے میں کامیاب ہوگئے۔