چیف آف آرمی سٹاف جنرل قمر جاوید باجوہ سے امریکی کارنیل یونیورسٹی کے طلبہ کی ملاقات،پاکستان کو خوبصورت اور پرامن ملک قرار دیا

ہفتہ 7 اپریل 2018 23:23

راولپنڈی ۔ (اُردو پوائنٹ اخبارتازہ ترین - اے پی پی۔ 07 اپریل2018ء) پاکستان کے دورے پر آئے امریکی کارنیل یونیورسٹی کے طلبہ نے چیف آف آرمی سٹاف جنرل قمر جاوید باجوہ سے ملاقات کی، جس میں انہوں نے پاکستان کے پہلے دورے سے متعلق اپنے تجربات اور خیالات بیان کیے،انہوں نے پاکستان کو ایک خوبصورت اور پرامن ملک قرار دیا۔

(جاری ہے)

پاک فوج کے شعبہ تعلقات عامہ( آئی ایس پی آر ) کی جانب سے جاری تفصیلات کے مطابق امریکی یونیورسٹی کے طلبہ نے لاہور، وادی ہنزہ، ریماؤنٹ ڈپو مونا اور اسلام آباد کا دورہ کیا۔

اس موقع پر آرمی چیف نے طلبہ کو پاکستان اور قیام امن سے متعلق کوششوں سے آگاہ کیا۔ آرمی چیف کا کہنا تھا نوجوان ہی ملک کے مستقبل کے رہنما ہوتے ہیں اور پاکستانی نوجوان ہرشعبے میں متحرک کردارادا کررہے ہیں۔طلبا نے آرمی چیف کا شکریہ ادا کیا اور کہا کہ وہ اس حقیقت کے ساتھ اپنے وطن واپس جا رہے ہیں کہ پاکستان پرامن اور خوبصورت ملک ہے۔