ارکان پنجاب اسمبلی شہاب الدین سیہڑ، احسن فتیانہ اور احمد شاہ کھگہ کی عمران خان سے ملاقات، پی ٹی آئی میں شمولیت کا اعلان

قومی خزانے کو شیر مادر کی طرح برتنے والوں سے جواب طلبی ناگزیر ہے، عمران خان پنجاب کے عوام کو محروم رکھ کر بیرون ملک تجوریاں بننے والوں کا محاسبہ وقت کا تقاضا ہے، چیئرمین پی ٹی آئی

منگل 3 اپریل 2018 22:03

ارکان پنجاب اسمبلی شہاب الدین سیہڑ، احسن فتیانہ اور احمد شاہ کھگہ کی ..

اسلام آباد (اُردو پوائنٹ اخبارتازہ ترین - این این آئی۔ 03 اپریل2018ء) پنجاب اسمبلی کے تین اراکین نے پاکستان تحریک انصاف میں شمولیت کا اعلان کردیا ۔ جاری بیان کے مطابق شہاب الدین سیہڑ، احسن فتیانہ اور احمد شاہ کھگہ نے منگل کو عمران خان سے ملاقات کی اورپی ٹی آئی میں شمولیت کا اعلان کیا ۔ رہنمائوں نے تحریک انصاف کی قیادت اور منشور پر مکمل اعتماد کا اظہار کرتے ہوئے کہا کہ تحریک انصاف قوم کی امیدوں کا محور و مرکز بن چکی ہے۔

عمران خان نے پاکستان کی سیاست میں تبدیلی کی بنیاد رکھی ہے۔پنجاب کے عوام استحصال اور کرپشن سے عاجز آچکے ہیں۔

(جاری ہے)

اراکین پنجاب اسمبلی نے کہا کہ آئندہ انتخابات میں تحریک انصاف پنجاب کی واحد اکثیریتی جماعت بن کر ابھرے گی۔چیئرمین پی ٹی آئی عمران خان نے اراکین اسمبلی کی تحریک انصاف شمولیت کو خوش آمدید کہتے ہوئے کہا کہ ایک خاندان کے ہاتھوں میں مرتکز وسائل چھڑوا کر عوام میں تقسیم کرنے کا وقت ہے۔قومی خزانے کو شیر مادر کی طرح برتنے والوں سے جواب طلبی ناگزیر ہے۔پنجاب کے عوام کو محروم رکھ کر بیرون ملک تجوریاں بننے والوں کا محاسبہ وقت کا تقاضا ہے۔قوم کی لوٹی گئی دولت واگزار کروا کر ہی دم لیں گے۔نظام حکومت کی اصلاح اور عوام کی بہبود پر بھرپور محنت کریں گے۔