توہین عدالت ،ْدانیال عزیز کودفاع میں مزید دستاویزات پیش کرنے کی اجازت

جمعہ 30 مارچ 2018 16:09

اسلام آباد (اُردو پوائنٹ اخبارتازہ ترین - این این آئی۔ 30 مارچ2018ء) سپریم کورٹ نے توہین عدالت کیس میں وفاقی وزیر دانیال عزیز کو دفاع میں مزید دستاویزات پیش کرنے کی اجازت دیدی۔ جمعہ کو سپریم کورٹ میں جسٹس شیخ عظمت سعید کی سربراہی میں تین رکنی بینچ نے وفاقی وزیر دانیال عزیز کے خلاف توہین عدالت کیس کی سماعت کی۔کیس کے سلسلے میں ڈی جی پیمرا حاجی آدم بطور گواہ پیش ہوئے اور انہوں نے بیان دیتے ہوئے بتایا کہ ٹی وی پر چلنے والے پروگراموں کی مانیٹرنگ میری ذمہ داریوں میں شامل ہے ،ْ8 ستمبر2017 کو دانیال عزیز نے پی آئی ڈی میں پریس کانفرنس کی، 19 دسمبر2017 کو دانیال عزیزنے توہین آمیزبیان دیا۔

ڈی جی پیمرا نے دانیال عزیز کا 8 ستمبر اور 15 دسمبر 2017 کا ویڈیو کلپ عدالت میں پیش کیا، اس پر جسٹس عظمت سعید نے کہا کہ مجھے شک ہے 19 دسمبر والاکلپ 2 دن ٹی وی چینلز پر چلتا رہا۔

(جاری ہے)

دانیال عزیز کے وکیل علی رضا نے ڈی جی پیمرا سے جرح کرتے ہوئے عدالت سے استدعا کی کہ 15 دسمبر کا نجی ٹی وی چینل کا ویڈیو کلپ عدالت میں چلایاجائے۔اس پر جسٹس عظمت نے ریمارکس دیئے کہ یہ نہ ہو دانیال عزیز پرایک اور جرم کی فرد جرم لگانی پڑجائی انہوں نے دانیال عزیز کے وکیل سے مکالمہ کیا کہ علی رضا سوچ لیں۔

کمرہ عدالت میں دانیال عزیز کاویڈیو کلپ چلایا گیا جس پر گواہ ڈی جی پیمرا نے کہا کہ اس ویڈیو کی تصدیق نہیں کرسکتا۔عدالت میں گواہ کا بیان ریکارڈ کیے جانے کے بعد دانیال عزیز کے وکیل نے کہا کہ اپنے مؤکل کی جانب سے دستاویزات اور نیوزآئٹم پیش کرناچاہتا ہوں، گواہان کے بیان ریکارڈ کرانے اور تیاری کیلئے وقت دیاجائے۔عدالت نے دانیال عزیز کودفاع میں مزید دستاویزات پیش کرنے کی اجازت دیتے ہوئے کیس کی سماعت 16 اپریل تک ملتوی کردی۔