پارٹی سیکرٹریٹ ’’انصاف ہائوس‘‘ میں تحریک انصاف لیبر ونگ کا اجلاس

پی آئی اے کی نجکاری نہیں ہونے دیں گے،کارکنان پی آئی اے ریفرنڈم کے حوالے سے بھرپور تیاری کریں، خرم شیر زمان

منگل 27 مارچ 2018 23:12

پارٹی سیکرٹریٹ ’’انصاف ہائوس‘‘ میں تحریک انصاف لیبر ونگ کا اجلاس

کراچی (اُردو پوائنٹ اخبارتازہ ترین - این این آئی۔ 27 مارچ2018ء) پاکستان تحریک انصاف لیبر ونگ کا پارٹی سیکرٹریٹ ’’انصاف ہائوس ‘‘ کراچی میں اجلاس ہوا۔ اجلاس کی صدارت پی ٹی آئی لیبر ونگ کراچی کے صدر سربلند خان نے کی ۔آج کا اجلاس اس لحاظ سے اہم تھا کہ اس میں جنرل سیکریٹری پی ٹی آئی کراچی و سندھ اسمبلی میں پی ٹی آئی کے پارلیمانی لیڈر خرم شیر زمان نے خصوصی شرکت کی۔

اجلا س میں پی آئی اے کے ریفرنڈم کے حوالے سے تیاریوں کا ازسر نو جائزہ لیا گیاجو نو اپریل دو ہزار اٹھارہ سے شروع ہورہا ہے۔ اجلاس کے شرکاء سے گفتگو کرتے ہوئے پی ٹی آئی رہنمائوں نے یہ مؤقف اختیار کیا کہ ہم پی آئی اے کی نجکاری نہیں ہونے دیں گے۔ کارکنان کو پی آئی اے ریفرنڈم کے حوالے سے بھرپور تیاری کرنے کی ہدایات جاری کی گئیں۔

(جاری ہے)

اس موقعے پر کہاگیا کہ تحریک انصاف ریفرنڈم جیتے گی اور ادارے کی تعمیر و ترقی میں اپنا بھرپور کردار ادا کرے گی۔

ملازمین کے حقوق جو مختلف حیلے بہانوں سے غصب کیے گئے ہیں، وہ ہم دوبارہ دلوائیں گے۔ ہم وہ تمام حقوق و مراعات مزدوروں کو دلائیں گے جو اس حکومت نے مزدوروں سے چھین لیے ہیں۔ تحریک انصاف کی حکومت میں لاکھوں کروڑوں کے خسارے میں جانے والا پی آئی اے کا ادارہ پاکستان کی معیشت میں ریڑھ کی ہڈی ثابت ہوگا۔ ہم پی آئی اے میں مزید اصلاحات لائیں گے اور ادارے میں ملازمت کے مواقع تخلیق کیے جائیں گے۔