پی ایس ایل سیزن تھری کے کراچی میں انعقاد سے انٹرنیشنل کرکٹ بحال ہونے پر سیاسی، عسکری اور حکومتی شخصیات نے بھی خوشی کا اظہار

نیشنل اسٹیڈیم کراچی میں پہنچ کر اسلام آباد یونائیٹڈ اور پشاور زلمی کے مابین ہونے والا فائنل میچ بھی دیکھا میچ دیکھنے والوں میں وزیراعظم، گورنر کے پی کے، گورنر سندھ، وزیراعلیٰ سندھ، وزیر مملکت مریم اورنگزیب، عابد شیر علی، ڈی جی رینجرز، کور کمانڈر کراچی، بلاول بھٹو، وزیر داخلہ سندھ، ڈی جی آئی ایس پی آر ودیگر سیاسی، سماجی اور عسکری حکام شامل ہیں

اتوار 25 مارچ 2018 21:20

کراچی (اُردو پوائنٹ اخبارتازہ ترین - این این آئی۔ 25 مارچ2018ء) پاکستان سپر لیگ (پی ایس ایل) سیزن تھری کے کراچی میں انعقاد سے انٹرنیشنل کرکٹ بحال ہونے پر سیاسی، عسکری اور حکومتی شخصیات نے بھی خوشی کا اظہار کیا اور نیشنل اسٹیڈیم کراچی میں پہنچ کر اسلام آباد یونائیٹڈ اور پشاور زلمی کے مابین ہونے والا فائنل میچ بھی دیکھا۔ وزیراعلیٰ سندھ سید قائم علی شاہ کی دعوت پر وزیراعظم شاہد خاقان عباسی کراچی پہنچے جہاں ایئرپورٹ پر گورنر سندھ محمد زبیر نے وزیراعظم کا استقبال کیا۔

وزیراعظم کے ہمراہ ان کے مشیر مصدق ملک، مفتاح اسماعیل، وزیر مملکت مریم اورنگزیب اور دیگر حکومتی شخصیات تھیں۔ نیشنل اسٹیڈیم آمد پر پی ایس ایل کے کراچی میں میزبان وزیراعلیٰ سندھ سید مراد علی شاہ نے وزیراعظم کا استقبال کیا۔

(جاری ہے)

کور کمانڈر کراچی شاہد بیگ مرزا ، ڈی جی رینجرز سندھ میجر جنرل محمد سعید، پاکستان پیپلز پارٹی کے چیئرمین بلاول بھٹو زرداری، گورنر خیبر پختونخواہ اقبال ظفر جھگڑا، سندھ کابینہ کے وزراء، وزیر داخلہ سندھ سہیل انور سیال، آئی جی سندھ اللہ ڈنو خواجہ، ایڈیشنل آئی جی کراچی مشتاق مہر، ڈی جی آئی ایس پی آر جنرل آصف غفور، چھ فرنچائزز کے مالکان،سیاسی جماعتوں کے رہنمائوں ، دیگر حکومتی وسیاسی وشخصیات اور دیگر اعلیٰ حکام نے بھی نیشنل اسٹیڈیم پہنچ کر پی ایس ایل فائنل انجوائے کیا۔