نیشنل سٹیڈیم کراچی میں پاکستان سپر لیگ کی اختتامی تقریب ،ْ فنکاروں نے تقریب کو چار چاند لگا دیئے ، کراچی میں 9 سال بعد کرکٹ واپس آرہی ہے جس کے لیے کراچی والو! آپ کو مبارک ہو ،ْحکومت اور سکیورٹی فورسز کا شکریہ ادا کرتے ہیں ،ْنجم سیٹھی

کراچی (اُردو پوائنٹ اخبارتازہ ترین - این این آئی۔ 25 مارچ2018ء) نیشنل اسٹیڈیم کراچی میں پاکستان سپر لیگ کی اختتامی تقریب منعقد ہوئی جس میں فنکاورں نے چار چاند لگا دیئے جبکہ چیئرمین پاکستان کرکٹ بورڈ (پی سی بی) نے خطاب کرتے ہوئے حکومت اور سیکیورٹی فورسز کا شکریہ ادا کیا۔نجم سیٹھی نے کہاکہ کراچی میں 9 سال بعد کرکٹ واپس آرہی ہے جس کیلئے کراچی والو! آپ کو مبارک ہو، پی ایس ایل میرا ہے نہ کسی سیاسی جماعت کا بلکہ یہ پاکستانیوں کا ٹورنامنٹ ہے۔

چیئرمین پی سی بی نے کہا کہ یہ ایک تاریخی موقع ہے، کراچی والوں کی دعائیں قبول ہوگئیں۔انھوں نے کہا کہ پی ایس ایل کے بعد ان شاء اللہ ویسٹ انڈیز کی ٹیم دورہ کرے گی۔کراچی میں پی ایس ایل کے فائنل کے لیے انتظامات کے حوالے سے سے نجم سیٹھی نے کہا کہ وزیراعلیٰ سندھ نے انتھک محنت کی اور ہمارا ساتھ دیا جبکہ تمام سیکیورٹی اداروں نے ہمیں تحفظ فراہم کیا اور ہمیں پاک فوج اورسیکیورٹی اداروں کی خدمات کو یاد رکھنا چاہیے۔

(جاری ہے)

نجم سیٹھی کے خطاب کے بعد گلوکارہ آئمہ بیگ، فرحان سعید، شہزاد رائے، اسٹرنگز اور علی ظفر نے اپنی آواز کا جادو جگایا۔اسلام آباد یونائیٹڈ کے کپتان نے تقریب کے دوران اسٹیج میں آکر پی ایس ایل کے لیے کیے گئے انتظامات اور سیکیورٹی کے حوالے سے اطمینان کا اظہار کیا۔پشاور زلمی کے کپتان ڈیرن سیمی اور فاسٹ باؤلر حسن علی بھی گلوکاروں کی پرفارمنس پر جھوم اٹھے۔

ڈیرن سیمی نے اس موقع پر پشتو میں اردو میں بات کی.پشاور کے کپتان نے کہا کہ پخیرراغلے ،کیسے ہو کراچی، ہم یہاں جیتنے کے لیے آئے ہیں اور آخر میں پاکستان زندہ باد کا نعرہ لگایا۔یاد رہے کہ پی ایس ایل کے ابتدائی2 ایڈیشنز کے فائنل میچ دبئی اور لاہور میں ہوئے تھے اور یہ پہلا موقع ہے کہ کراچی کے نیشنل اسٹیڈیم میں پاکستان سپر لیگ کا کوئی میچ کھیلا گیا جس کی بنا پر شہر بھر خاص طور پر اسٹیڈیم آنے والے تمام راستوں کو غیر ملکی اور قومی کھلاڑیوں کے پورٹریٹس سے سجا دیا گیا ،ْ میچ کے ساتھ ہی نیشنل اسٹیڈیم تقریباً 9 سال بعد پہلی مرتبہ کسی عالمی سطح کے مقابلے کی میزبانی کرے گا اور غیر ملکی کرکٹرز ایکشن میں نظر آئیں گے، جہاں آخری مرتبہ فروری 2009 میں اس میدان پر پاکستان اور سری لنکا کے درمیان ٹیسٹ میچ کھیلا گیا تھا۔

خیال رہے کہ نیشنل اسٹیڈیم میں تقریباً 32 ہزار سے زائد تماشائیوں کے بیٹھنے کی گنجائش ہے اور فائنل میچ کو دیکھنے کے لئے ٹکٹ صرف 2 روز میں فروخت ہوگئے تھے۔