حکومت ایمنسٹی سکیم متعارف کرانے کے لیے تیار ہے،پاکستان آئی ایم ایف کے کسی بھی پروگرام کے لیے نہیں جا رہا، ڈاکٹر مفتاح اسماعیل

ہفتہ 24 مارچ 2018 22:01

اسلام آباد ۔ (اُردو پوائنٹ اخبارتازہ ترین - اے پی پی۔ 24 مارچ2018ء) وزیراعظم کے مشیر برائے اقتصادی امور ڈاکٹر مفتاح اسماعیل نے کہا ہے کہ حکومت ایمنسٹی سکیم متعارف کرانے کے لیے تیار ہے جسے بہت جلد ہی پیش کیا جائے گا۔ ایک نجی ٹی وی چینل سے بات چیت کرتے ہوئی انہوں نے کہا کہ یہ منصوبہ ملک کے لیے مثبت ثابت ہو گا اور قومی معیشت کے لیے مددگار بھی ثابت ہو گا۔

انہوں نے کہا کہ ان دنوں درآمدات برآمدات سے کہیں زیادہ ہیں لیکن ڈالر کی قیمت میں اضافے سے برآمدات پر مثبت اثر پڑے گا۔

(جاری ہے)

انہوں نے مذید کہا کہ درآمدات کی کمی ترسیلات زر میں اضافہ کرے گی۔ مشیر وزیراعظم کا کہنا تھا کہ آنے والے دنوں میں بجلی کی قیمتوں میں کمی ہو گی اور پاک چین اقتصادی راہداری کے متعدد منصوبوں کی تکمیل سے ملک کو بہت فائدہ ہو گا۔ ایک سوال کے جواب میں انہوں نے کہا کہ پاکستان آئی ایم ایف کے کسی بھی پروگرام کے لیے نہیں جا رہا۔ انہوں نے کہا کہ پاکستان میں اب 12.8 بلین ڈالرز غیر ملکی ذخائر ہیں جو اگلے 4 ماہ میں 600 ملین ڈالرز مذید بڑھیں گے۔ انہوں نے کہا کہ حکومت ملکی جی ڈی پی میں اضافہ کرنا چاہتی ہے۔