لاہور،نواز شریف حکومتی مدت مکمل ہونے اور کرپشن ریفرنسز پر فیصلے آنے سے پہلے ملک چھوڑنا چاہتے ہیں، ڈاکٹر طاہر القادری

لاہور (اُردو پوائنٹ اخبارتازہ ترین - آن لائن۔ 23 مارچ2018ء) پاکستان عوامی تحریک کے سربراہ ڈاکٹر محمد طاہر ۱لقادری نے کہا ہے کہ نواز شریف حکومتی مدت مکمل ہونے اور کرپشن ریفرنسز پر فیصلے آنے سے پہلے ملک چھوڑنا چاہتے ہیں۔ وہ اپنی جماعت کے اقتدار سے باہر ہو نے سے پہلے ملک سے باہر جانے کیلئے پر تول رہے ہیں۔تحریک بغاوت چلانے والے قومی مجرم نواز شریف اب کس منہ سے مذاکرات کی بات کر رہے ہیں ۔

نا اہل ن لیگ کو ڈھال بنانے کی بجائے احتساب عدالت میں لندن اثاثوں کی منی ٹریل دیں۔ اداروں کو دھمکیاں دینے والا ’’شیر‘‘ آج کل ڈھیر ہونے کیلئے بے چین ہی مذاکرات بلیک میلروںاور قومی لٹیروں سے نہیں ہوتے۔ شہدائے ماڈل ٹائون کے ورثاء شریف برادران کا سانحہ ماڈل ٹائون کیس میں انسداد دہشتگردی کی عدالت میں ٹرائل چاہتے ہیں ۔

(جاری ہے)

وہ گزشتہ روز عوامی تحریک کے سنیئر رہنمائوں سے گفتگو کر رہے تھے ۔

ڈاکٹر طاہر القادری نے کہاکہ مجرم اور بے گناہ شہریوں کے قتل عام کا ماسٹر مائنڈ نواز شریف کسی قانونی،جمہوری،اخلاقی رعایت کا مستحق نہیں ہے ،اسے رعایت دینے کا مطلب ریاست کے خلاف اعلان جنگ کرنیوالوں کو انکے جرم کا جواز فراہم کرنے کے مصداق ہو گا ۔قومی مجرموں کو مذاکرات کی آڑ میں کوئی رعایت ملی تو پھر اس ملک میں کسی کاا حتساب ممکن نہیں رہے گا ۔

انہوں نے کہاکہ نا اہل ٹولے نے 1997 کی طرح عدلیہ اور 1999 کی طرح فوج کو تقسیم کرنیکی ہر ممکن سازش کی،سینے میں چھپے ہوئے راز اگلنے کی دھمکیاں دے کر اداروں کو بلیک میل کرنیکی کی بھونڈی حرکت بھی کی مگر وہ کسی ہتھکنڈے میں کامیاب نہیں ہوسکے اور اب مایوس اور خوفزدہ نواز شریف 31مئی سے پہلے ملک سے بھاگنا چاہتے ہیں، ڈاکٹر طاہر القادری نے مزید کہا کہ سیاسی جماعتیں پی آئی اے اور سٹیل مل کی فروخت پر سراپا احتجاج ہیں مگر ملکی تاریخ میں پہلی بار پنجاب میں تمام بڑے ہسپتال اور سکول آئوٹ سورس کرنے کے نام پر بیچے جا رہے ہیں اور یہ کام قاتل اعلیٰ پنجاب کر گزرا ہے۔

انہوں نے کہاکہ جناح ہسپتال،میو ہسپتال،گنگا رام ہسپتال سمیت تمام بڑے ہسپتالوں کی بولیاں لگ چکی ہیں،یہ ہسپتال پرائیویٹ مافیا کے ہاتھ چلے گئے تو پھر کسی غریب کو مفت میں ڈسپرین اور پینا ڈول بھی نہیں ملے گی ۔انہوں نے کہا کہ اورنج ٹرین،میٹرو بسیں اور قومی خرچے پر 56کمپنیاں چلانے والے قاتل اعلیٰ پنجاب سے ہسپتال اور تعلیمی ادارے کیوں نہیں چل رہے