ٹرمپ کا چین سے 60 ارب ڈالر تک کی درآمدات پر ٹیکس نافذ کرنے کا اعلان

واشنگٹن(اُردو پوائنٹ اخبارتازہ ترین - آن لائن۔ 23 مارچ2018ء) امریکی صدر ڈونلڈ ٹرمپ نے چین سے 60 ارب ڈالر تک کی درآمدات پر ٹیکس عائد کرنے کے صدارتی حکم نامے پر دستخط کر دیئے ۔غیرملکی خبررساں ادارے کے مطابق ڈونلڈ ٹرمپ نے چین کی درآمدات پر محصولات لگانے کے حکم نامے پر دستخط کرتے ہوئے کہا کہ یہ امریکا میں چین کی تجارتی سرگرمیوں کو محدود کرنے کے متعدد اقدامات میں سے پہلا تجارتی ایکشن ہے۔

امریکی صدر کے اس اقدام سے 60 ارب ڈالر تک کی چینی مصنوعات پر اضافی ٹیکس عائد کیا جائے گا البتہ ان مصنوعات کی فہرست بعد میں جاری کی جائے گی۔وائٹ ہاس کے حکام کا کہنا تھا کہ اقدام کا مقصد چین کے اس غیر منصفانہ تجارتی طریقہ کار کو روکنا ہے جس کے ذریعے بیجنگ ہماری کمپنیوں کے املاک دانش یعنی نت نئے خیالات کو چوری کر رہا ہے۔

(جاری ہے)

چین کے خلاف تازہ ترین امریکی ایکشن کے تحت امریکا کے تجارتی نمائندے رابرٹ لائٹیزر کا ادارہ چین کے غیر منصفانہ تجارتی اقدامات کے حوالے سے تحقیقاتی رپورٹ 15 روز میں جاری کرے گا جس میں امریکی املاک دانش کی چوری میں ملوث چینی مصنوعات کی فہرست شامل ہوگی۔

وائٹ ہاس حکام کا کہنا تھا کہ امید کرتے ہیں دوسرے ممالک بھی چین کے خلاف اس اقدام میں ہمارا ساتھ دیں گے۔صدارتی حکم نامے کے مندرجات کے مطابق امریکی صدر ڈونلڈ ٹرمپ 60 روز کے دوران ہونے والے مشاورت کے بعد ہی چینی درآمدات کو نشانہ بنائیں گے، اس عرصے کے دوران انڈسٹری لابسٹ اور قانون سازوں کے پاس یہ موقع ہوگا کہ وہ 1300 چینی مصنوعات کی مجوزہ فہرست میں رد و بدل کراسکیں۔

ڈونلڈ ٹرمپ نے چین کے خلاف اقدامات کا اعلان کرتے ہوئے کہا کہ ہم نے اس سلسلے میں چین سے بات کی ہے اور ہمارے مذاکرات اب بھی جاری ہیں۔انہوں نے کہا کہ غیر منصفانہ تجارت کی وجہ سے امریکا میں روزگار کے مواقع کم ہورہے ہیں اور ان کے صدارتی منشور میں روزگار کی فراہمی اولین ترجیح تھی۔علاوہ ازیں ڈونلڈ ٹرمپ امریکی محکمہ خزانہ کو یہ ہدایات بھی جاری کریں گے کہ وہ ان اقدامات کی نشاندہی کرے جن کے ذریعے امریکا میں چینی سرمایہ کاری کو محدود کیا جاسکتا ہے،ادھر چین کی حکومت نے خبردار کیا کہ چین اپنے مفادات کے تحفظ کے لیے تمام تر اقدامات کرے گا،چینی حکومت نے امریکا کو خبردار کیا ہے کہ چین اپنے مفادات کے تحفظ کے لیے تمام ممکنہ اقدامات کرے گا۔۔