پاک فضائیہ کے سربراہ کا نیول ہیڈ کوارٹرز کا دورہ، نیول چیف ایڈمرل ظفر محمود عباسی سے ملاقات

نیول ہیڈ کوارٹرز آمد پر ایئر چیف مارشل مجاہد انور خان کا استقبال کیاگیا،ترجمان پاک بحریہ تمام اہم آپریشنز اورانٹرسروسز امور کی انجام دہی کیلئے پاک بحریہ اور پاک فضائیہ کے مابین تعاون اور موثر رابطوں میں مزید اضافہ ہو گا،نیول چیف

جمعرات 22 مارچ 2018 20:38

پاک فضائیہ کے سربراہ کا نیول ہیڈ کوارٹرز کا دورہ، نیول چیف ایڈمرل ظفر ..

اسلام آباد(اُردو پوائنٹ اخبارتازہ ترین - آن لائن۔ 22 مارچ2018ء) پاک فضائیہ کے نئے تعینات ہونے والے سربراہ ایئر چیف مارشل مجاہد انور خان نے کمانڈ سنبھالنے کے بعد نیول ہیڈ کوارٹرز کا پہلا دورہ کیا اور پاک بحریہ کے سربراہ ایڈمرل ظفر محمود عباسی سے ملاقات کی۔ پاک بحریہ سے جاری پریس ریلیز کے مطابق نیول ہیڈ کوارٹرز آمد پر پاک بحریہ کے سربراہ نے ایئر چیف مارشل مجاہد انور خان کا استقبال کیا۔

پاک بحریہ کے چاق و چوبند دستے نے معزز مہمان کو سلامی پیش کی جس کے بعد نیول ہیڈکوارٹرز میں تعینات پرنسپل سٹاف آفیسرز سے ایئر چیف کا تعارف کرایا گیا۔ باہمی ملاقات کے دوران سربراہ پاک بحریہ نے ایئر چیف مارشل مجاہد انور خان کو ترقی پانے اور پاک فضائیہ کی کمان سنبھالنے پر مبارکباد دی۔

(جاری ہے)

دونوں افواج کے مضبوط تعلقات کا حوالہ دیتے ہوئے نیول چیف نے کہا کہ تمام اہم آپریشنز اورانٹرسروسز امور کی انجام دہی کیلئے پاک بحریہ اور پاک فضائیہ کے مابین تعاون اور موثر رابطوں میں مزید اضافہ ہو گا۔

سربراہ پاک بحریہ نے قوی یقین کا اظہار کیا کہ ایئر چیف مارشل مجاہد انور خان کی سربراہی میں پاک فضائیہ ترقی کی نئی منازل طے کرے گی۔ نیول ہیڈکوارٹرز کے دورہ کے دوران ایئر چیف مارشل مجاہد انور خان نے ایڈمرل ظفر محمود عباسی کو پاک فضائیہ کے مکمل تعاون کا یقین دلایا اور ملکی دفاع کو ناقابلِ تسخیر بنانے کے لئے مل کر کام کرنے کا عہد کیا۔