رینجرز کی ڈیفنس کے علاقے میں کارروائی، ملزم گرفتار، منشیات و دیگر اشیاء برآمد

بدھ 21 مارچ 2018 23:03

کراچی ۔ (اُردو پوائنٹ اخبارتازہ ترین - اے پی پی۔ 21 مارچ2018ء) پاکستان رینجرز سندھ نے مصدقہ اطلاعات پر ڈیفنس کے علاقے بدر کمرشل فیز V میں واقع ایک فلیٹ پر چھاپہ مار کر اظہر عزیز ملا کو گرفتار کر لیا جو علاقے میں آئس، کرسٹل، منشیات فروشی اور جسم فروشی جیسے کاروبار میں ملوث ہے۔

(جاری ہے)

بدھ کو جاری کردہ اعلامیہ کے مطابق گرفتار ملزم کے قبضے سے 61 گرام آئس، 5 گرام ایم ڈی ایم پائوڈر، 1.5 گرام کوکین، ایک پیکٹ حشیش پیپر، آئس بنانے کا سامان بمعہ آلات، نشہ آور ادویات، 5 عدد موبائل فون، 2 عدد لیپ ٹاپ، 7 عدد پاسپورٹ اور 37 عدد مختلف مہریں برآمد ہوئی ہیں۔

ملزم کو قانونی چارہ جوئی کے لئے پولیس کے حوالے کر دیا گیا ہے۔ اعلامیہ میں رینجرز نے عوام سے گذارش کی ہے کہ جرائم پیشہ عناصر کی اطلاع فوری طور پر قریبی چیک پوسٹ یا رینجرز مددگار واٹس ایپ نمبر 0316-2369996، ای میل ایڈریس [email protected] یا رینجرز ہیلپ لائن 1101 پر کال یا ایس ایم ایس کے ذریعے دیں۔