دنیا کے سب سے بڑے جیٹ انجن سے لیس طیارے کی پرواز

بوئنگ کمپنی نے جنرل الیکٹرک کو خاص آرڈر دیکر تیار کروایا،اسی طرز کے دیگر انجنوں کی تیاری بھی شروع

منگل 20 مارچ 2018 12:15

کیلیفورنیا(اُردو پوائنٹ اخبارتازہ ترین - این این آئی۔ 20 مارچ2018ء) شہری ہوابازی کے شعبے میں جدید ترین طیاروں کے درمیان مقابلہ جاری ہے مگر یہ مقابلہ یہاں پر ہی ختم نہیں ہوا بلکہ مختلف طیارہ ساز کمپنیوں نے انتہائی بڑے بڑے انجنوں والے طیاروں کی آزمائشی پروازیں کررہے ہیں اور ایسی ہی ایک پرواز بوئنگ 747 نامی طیارے نے وکٹر ویل ایئرپورٹ سے آزمائشی اڑان بھری ۔

میڈیارپورٹس کے مطابق اس وقت اس طیارے میں دنیا کا سب سے بڑا جیٹ انجنGE9X لگا ہوا تھا۔ بوئنگ کمپنی نے یہ انجن جنرل الیکٹرک کو خاص آرڈر دیکر تیار کروایا۔

(جاری ہے)

اپنے آرڈر میں بوئنگ کمپنی نے جو اصل مطالبہ کیا تھا وہ یہ تھا کہ نیا انجن اس قابل ہونا چاہئے کہ مستقبل قریب میں بوئنگ کمپنی جو 777x نامی قوی الجثہ طیارہ بنانے جارہی ہے اس کو پوری طاقت فراہم کرسکے۔

اب تک کے اندازے کے مطابقGE9X طیارہ اپنے اندر نصب انجن کی قوت سے آئندہ سال کے آخر تک اڑان بھرنے لگے گا تاہم اسکی اصل کمرشل پروازیں 2020ء میں شروع ہوسکتی ہیں۔ کہا جاتا ہے کہ جنرل الیکٹرک والوں نے آنے والے وقت میں مختلف طیارہ ساز کمپنیوں کیلئے طرح طرح کے دوسرے انجنوں کی تیاری بھی شروع کردی ہے اور انکا ٹیسٹ بھی لیا جارہا ہے۔