سلمان خان کی ساتھی اداکارہ کے پاس علاج کیلئے پیسے نہیں

ممبئی(اُردو پوائنٹ اخبارتازہ ترین - این این آئی۔ 20 مارچ2018ء) بالی ووڈ اداکار سلمان خان کی فلم ’ویرگتی‘ میں ساتھی اداکارہ کا کردار ادا کرنے والی پوجا ددوال ٹی بی کے مرض میں مبتلا ہیں اور ان کے پاس علاج تک کے پیسے نہیں ہیں۔ بھارتی میڈیا رپورٹس کے مطابق 1995 میں فلم ’ویر گتی‘ میں سلمان خان نے مدمقابل مرکزی کردار اداکرنے والی اداکارہ پوجا ددوال ٹیوبر کلوسس (ٹی بی) میں مبتلا ہونے کی وجہ سے ممبئی کے اسپتال میں زیر علاج ہیں۔

اداکارہ کا کہنا ہے کہ میں 7 سال سے گوا کے کسینو میں کام کر رہی تھی جب کہ 6 ماہ قبل ہی مجھے پتہ چلا کہ میں ٹی بی جیسے مرض میں مبتلا ہوں اور گزشتہ 15 روز سے اسپتال میں داخل ہوں اور اس وقت میرے پاس اتنے بھی پیسے نہیں ہیں کہ ایک چائے کا کپ تک خرید سکوں کیوں کہ بیماری کا پتہ چلنے کے بعد میرے شوہر اور سسرالی مجھے چھوڑ کر جا چکے ہیں۔

(جاری ہے)

اداکارہ نے مزید بتایا کہ پیسے نہ ہونے کی وجہ سے میں نے سلمان خان سے کئی بار رابطہ کرنے کی کوشش کی لیکن کسی طرح کی کوئی کامیابی حاصل نہیں ہوئی، کیا پتہ وہ میرا پیغام پڑھ کر میری مالی مدد کر سکے۔

واضح رہے کہ 90 کی دہائی کی اداکارہ پوجا ددوال نے نہ صرف ’ویر گتی‘ بلکہ انتقام، ہندوستان اور دبدبا جیسی کئی مشہور فلموں میں اداکاری کے جوہر دکھائے ہیں۔