یوم پاکستان کے موقع پر سکیورٹی کے فول پروف انتظامات کی ہدایت

پیر 19 مارچ 2018 12:46

فیصل آباد۔19 مارچ(اُردو پوائنٹ اخبارتازہ ترین - اے پی پی۔ 19 مارچ2018ء) صوبہ بھر میں 23مارچ جمعہ کو یوم پاکستان کے موقع پرتمام اہم مقامات کی فول پروف سکیورٹی کے احکا مات جاری کئے گئے ہیں ۔ اس ضمن میںمحکمہ داخلہ پنجاب اور انسپکٹر جنرل پولیس پنجاب کی جانب سے تمام ڈویژنز کے انتظامی و پو․لیس حکام ، ریجنل پولیس آفیسرز، کمشنر ز ، رینج ڈی آئی جیز ،سٹی پولیس آفیسرز ، ڈی سیز ، ڈسٹرکٹ پولیس آفیسرز اور دیگر حکام کے نام جاری کئے گئے مراسلہ میں کہا گیا ہے کہ جمعہ کو تمام شہروں میں بالعموم اور بڑے و حساس شہروں میں بالخصوص یوم پاکستان کے موقع پر امن و امان کی صورتحال برقرار رکھنے کیلئے تمام وسائل بروئے کا ر لائے جائیں۔

فیصل آباد ریجنل پولیس کے ذرائع نے بتا یا کہ یوم پاکستان کی تقریبا ت کی جگہوں پر مطلوبہ تعداد میں پولیس کے باوردی اہلکار تعینات کئے جائیں گے اور حساس مقامات کے قریب کلوز سرکٹ ٹی وی کیمروں کی تنصیب سمیت ان کی مانیٹرنگ بھی یقینی بنائی جائے گی تاکہ شر پسند عناصر پر کڑی نظر رکھی جا سکے۔

(جاری ہے)

انہوںنے بتا یا کہ تمام اضلاع کے ضلعی انتظامی و پولیس حکام کو مزید ہدائت کی گئی ہے کہ وہ بھی یوم پاکستان کے موقع پر فول پر وف سکیورٹی پلان پر عملدر آمد یقینی بنائیں تاکہ تمام تر حفاظتی و تدارکی اقدامات کو مکمل رکھا جا سکے۔