ڈاکٹر عامر لیاقت کا تحریک انصاف میں شمولیت کا فیصلہ، معاملات طے پاگئے

نجی ٹی وی چینل کے پروگرام سے گفتگو کرتے ہوئے عامر لیاقت حسین نے اگلے ہفتے سیاست میں واپسی کا اعلان کیا، جبکہ تحریک انصاف کو اپنی پسندیدہ ترین جماعت بھی قرار دیا، عمران اسماعیل نے بھی شمولیت کی تصدیق کردی

محمد علی ہفتہ 17 مارچ 2018 18:43

ڈاکٹر عامر لیاقت کا تحریک انصاف میں شمولیت کا فیصلہ، معاملات طے پاگئے

کراچی (اُردو پوائنٹ تازہ ترین اخبار۔ 17 مارچ 2018ء) ڈاکٹر عامر لیاقت نے تحریک انصاف میں شمولیت کا فیصلہ کیا ہے۔ تفصیلات کے مطابق معروف ٹی وی اینکر و مذہبی اسکالر ڈاکٹر عامر لیاقت نے تحریک انصاف میں شمولیت کا فیصلہ کیا ہے۔ اس حوالے سے ان کے تحریک انصاف سے معاملات بھی طے پاگئے ہیں۔ عامر لیاقت عمران خان کیساتھ جلد پریس کانفرنس کرکے اپنی شمولیت کا اعلان کریں گے۔

ڈاکٹر عامر لیاقت حسین کچھ عرصہ قبل ہی تحریک انصاف میں شمولیت اختیار کرنے والے تھے اور تب بھی اس حوالے سے معاملات طے پاگئے تھے۔

(جاری ہے)

تاہم تحریک انصاف کے رہنماوں اور کارکنوں کے بھرپور احتجاج اور اعتراض کے بعد عمران خان عامر لیاقت کو پارٹی میں شامل کرنے کا معاملہ موخر کرنے پر مجبور ہوگئے تھے۔ اب عامر لیاقت کی جانب سے ہفتے کے روز نجی ٹی وی چینل کے پروگرام سے گفتگو کرتے ہوئے اعلان کیا گیا کہ وہ آئندہ ہفتے سیاست میں واپسی کر رہے ہیں۔ جبکہ اس دوران انہوں نے یہ بھی بتایا کہ اس وقت ان کی پسندیدہ ترین جماعت تحریک انصاف ہے۔ اس حوالے سے تحریک انصاف کے رہنما عمران اسماعیل نے بھی نجی ٹی وی چینل کے پروگرام سے گفتگو کرتے ہوئے تصدیق کر دی ہے۔