حیدرآباد میں شدید خشک سالی کے بعد اچانک ہونے والی ہلکی بارش سے موسم خوشگوار ہو گیا

بدھ 14 مارچ 2018 22:46

حیدرآباد(اُردو پوائنٹ اخبارتازہ ترین - این این آئی۔ 14 مارچ2018ء) حیدرآباد میں شدید خشک سالی کے بعد بدھ کو شام میں اچانک ہونے والی ہلکی بارش سے موسم خوشگوار ہو گیا، بیشتر علاقوں میں بجلی کے بریک ڈاؤن سے شہر میں رات تک تاریکی چھائی رہی، حیدرآباد اور گر د و نواح میں شام 5 بجے کے بعد اچانک موسم کی پہلی ہلکی بارش ہوئی دھوپ کے ساتھ وقفے وقفے سے بارش کا سلسلہ بھی جاری رہا، بارش کے ساتھ ہی بجلی کی ترسیل بندہو گئی اور رات تک سٹی لطیف آباد اور قاسم آباد کے کئی علاقے تاریکی میں ڈوبے ہوئے تھے جبکہ نشیبی سڑکوں سمیت نشیبی علاقوں میں بارش کا کچھ پانی بھی کھڑا نظر آیا، اس وقت شدید خشک سالی کی وجہ سے نظام آبپاشی میں پانی کی شدید قلت ہے اور نہروں میں صرف پینے کے لئے پانی فراہم کیا جا رہا ہے، پانی نہ ملنے کی وجہ سے گندم کی پیداوار بھی متاثر ہوئی ہے، ایسے میں باران رحمت کی سخت ضرورت ہے اللہ تعالی نے جس کا آغاز کر دیا ہے، مزید بارشوں کی توقع ہے۔