پاکستان او آئی سی کے تین ذیلی اداروں کے گورننگ بورڈز کا رکن منتخب

ان اداروں کیلئے پاکستان کا انتخاب او آئی سی کیساتھ ہماری گہری وابستگی ،مسلم ممالک کے درمیان مختلف شعبوں میں تعاون کو فروغ دینے کی کوششوں کا عکاس ہے، ترجمان دفتر خارجہ

بدھ 14 مارچ 2018 22:12

پاکستان او آئی سی کے تین ذیلی اداروں کے گورننگ بورڈز کا رکن منتخب

ْاسلام آباد (اُردو پوائنٹ اخبارتازہ ترین - این این آئی۔ 14 مارچ2018ء) پاکستان کو اسلامی تعاون تنظیم (او آئی سی) کے تین ذیلی اداروں کے گورننگ بورڈز کا رکن منتخب کر لیا گیا۔ میڈیا رپورٹ کے مطابق پاکستان کا انتخاب جدہ میں منعقدہ اقتصادی، ثقافتی اور سماجی امور سے متعلق اسلامک کمیشن کے 41ویں سیشن کے دوران عمل میں لایا گیا۔

(جاری ہے)

ان ذیلی اداروں میں اسلامک سنٹر برائے تجارتی ترقی (آئی سی ڈی ٹی) ہیڈ کوارٹر کاسا بلانکا، اسلامک یونیورسٹی آف ٹیکنالوجی (آئی یو ٹی) ہیڈ کوارٹرز ڈھاکہ اور ریسرچ سنٹر برائے اسلامی تاریخ، آرٹ اور ثقافت (آئی آر سی آئی سی ای) ہیڈ کوارٹرز استنبول شامل ہیں۔

ترجمان دفتر خارجہ نے بدھ کو جاری بیان میں کہا ہے کہ ان اداروں کیلئے پاکستان کا انتخاب او آئی سی کیساتھ ہماری گہری وابستگی اور مسلم ممالک کے درمیان مختلف شعبوں میں تعاون کو فروغ دینے کی غرض سے ہماری کوششوں کا عکاس ہے۔ یہ اس مکمل اعتماد کا بھی مظہر ہے جو او آئی سی کے رکن ملکوں میں پاکستان کو حاصل ہے۔ ترجمان کا کہنا ہے کہ پاکستان او آئی سی رکن ملکوں کے مابین تجارت، تعلیم، اسلامی آرٹ و ثقافتی کی ترقی کو فروغ دینے کیلئے اپنا فعال کردار جاری رکھے گا۔