فیصل آباد،بین الاقوامی مرکز برائے ترقی گندم و مکئی پاکستان کو پیداوار بڑھانے کیلئے وسائل فراہم کرے گا،ترجمان

فیصل آباد۔14 مارچ(اُردو پوائنٹ اخبارتازہ ترین - اے پی پی۔ 14 مارچ2018ء) بین الاقوامی مرکز برائے ترقی گندم و مکئی پاکستان کو گندم و مکئی کی پیداوار بڑھانے کیلئے بھر پور تکنیکی مہارت اور وسائل فراہم کرے گا جبکہ عالمی سطح پر زراعت کے شعبہ میں ہونے والی جدید تحقیق اور زرعی ٹیکنالوجی کے فروغ سے حاصل ہونے والی کامیابیوں میں پاکستان کے زرعی ماہرین ، سائنسدانوں ، زمینداروں ، چھوٹے کاشتکاروں کو بھی شامل کیاجائے۔

بین الاقوامی مرکز برائے ترقی گندم و مکئی کے ترجمان نے بتایاکہ ماضی میں میکسی پاک کے ذریعے پاکستان کی گندم کی پیدا وار میں جو اضافہ دیکھنے میں آیا تھا اس طرح کی کوششیں ایک بار پھر بروئے کار لانے کی ضرورت ہے ۔ انہوں نے کہا کہ پاکستان کے زمینی وسائل سے زیادہ پیدا وار حاصل کرنے کیلئے مختلف عوامل کا جائزہ لیا جا رہا ہے ‘ خصوصی طور پر نائیٹروجنی کھادوں کی اثر پذیری میں سست روی جیسے مسائل کو ترجیحی بنیادوں پر حل کرنے کی ضرورت ہے ۔

(جاری ہے)

انہوں نے کہا کہ پاکستان میں امریکی فصلات کے مقابلے میں نائٹروجن کی اثر پذیری کی رفتار 2.5 فیصد کم ہے جسے مؤثر بنا کر پیدا واریت میں اضافہ کیا جا سکتا ہے ۔انہوں نے بتایا کہ یہاں ہونے والی کامیابیوں کو ایک سسٹم کے تحت عام کسان کی دہلیز تک پہنچانے کیلئے متعدد منصوبوں پر کام جاری ہے ۔