عمران خان کیخلاف توہین عدالت کی درخواست ابتدائی سماعت کے لیے منظور

منگل 13 مارچ 2018 17:52

اسلام آباد (اُردو پوائنٹ اخبارتازہ ترین - آن لائن۔ 13 مارچ2018ء) سپریم کورٹ نے چیئرمین تحریک انصاف عمران خان کیخلاف توہین عدالت کی درخواست ابتدائی سماعت کے لیے منظور کرتے ہوئے سماعت کے لیے مقرر کرنے کا حکم دیدیا ہے ۔

(جاری ہے)

چیئرمین تحریک انصاف عمران خان کیخلاف نصیر کیانی نامی درخواست گزار کی طرف سے دائر توہین عدالت کیس کی سماعت چیف جسٹس کی سربراہی میں تین رکنی بینچ نے کی ، تو درخواست گزار کی طرف سے حشمت حبیب ایڈووکیٹ پیش ہوئے اور موقف اختیار کیا کہ عمران خان نے سابق چیف جسٹس افتخار چوہدری کیخلا ف توہین آمیز الفاظ استعمال کیے ، عمران خان توہین عدالت کے مرتکب ہوئے ہیں ، عمران خان کیخلاف توہین عدالت کی کارروائی چلائی جائے اس پر چیف جسٹس نے درخواست کو ابتدائی سماعت کے لیے منظور کر لیا اور کہا کہ ٹھیک ہے اس معاملے کو علیحدہ سے سماعت کے لیے مقرر کر کے سن لیتے ہیں ، عدالت نے عمران خان کیخلاف توہین عدالت کی درخواست سماعت کے لیے مقرر کرنے کا حکم دیتے ہوئے کیس کی سماعت غیر معینہ مدت کے لیے ملتوی کردی درخواست گزار نصیر کیانی نے عمران خان کی جانب سے سابق چیف جسٹس افتخار چوہدی کیخلاف توہین آمیز الفاظ استعمال کرنے پر سپریم کورٹ سے رجوع کر رکھا ہے ۔