رواں سال 8 لاکھ بچوں کو پولیو سے بچائو کے قطرے پلوانے کا ہدف مقرر کیا گیا ہے، اسلام زیب خان

پشاور۔ (اُردو پوائنٹ اخبارتازہ ترین - اے پی پی۔ 12 مارچ2018ء) ڈپٹی کمشنر پشاور اسلام زیب خان نے کہا ہے کہ پولیو کے خاتمہ کی کامیاب کاوشوںکے نتیجہ میںضلع پشاور گذشتہ دو سال سے پولیو فری ہے اور رواںسال انسداد پولیو مہم کے لئے پشاور بھر میں 8لاکھ سے زائد بچوں کو پولیو سے بچائو کے قطرے پلانے کا ہدف مقرر کیا گیا ہے۔ انہوں نے ان خیالات کا اظہار پیر کو فوجی فائونڈیشن ہسپتال پشاور میں پولیو مہم کے افتتاح کے موقع پر میڈیا کے نمائندوں سے بات چیت کے دوران کیا۔

اس موقع پر ایمرجنسی آپریشن سنٹر، محکمہ صحت اور دیگر معاون اداروں کے نمائندے اور حکام بھی موجود تھے ۔پولیو کے حوالہ سے صوبہ خیبر پختونخوا کی17ہائی رسک اضلاع پشاور، چارسدہ، نوشہرہ، مردان، صوابی، ملاکنڈ، سوات، لوئردیر، اپردیر، چترال، کوہاٹ، ہنگو، کرک، لکی مروت، بنوں اور ڈیرہ اسماعیل خان میںپیر سے تین روزہ انسداد پولیو مہم کا آغاز کیا گیا جس کے لئے ای او سی کوآرڈینیٹر عاطف رحمان کی نگرانی میںموثرحکمت عملی مرتب کی گئی ہے۔

(جاری ہے)

مہم کے دوران ان اضلاع کی مقامی آبادی اور یہاں واقع افغان مہاجرکیمپوں میں پانچ سال سے کم عمر کے 44 لاکھوں اور37 ہزار بچوں کو پولیو سے بچائو کے قطرے پلانے کا ہدف مقررکیاگیا ہے ۔صوبائی دارالحکومت پشاور کے فوجی فائونڈیشن ہسپتال میںمنعقدہ خصوصی تقریب میںڈپٹی کمشنر اسلام زیب خان نے بچوں کو قطرے پلاکر مہم کا افتتاح کیا اس موقع پرمیڈیا نمائندوں سے بات چیت میں انہوں نے کہا کہ پولیوکے خاتمہ کے لئے ہر گھر اور ہر بچے تک پہنچ کر اسے پولیو سے بچائو کے قطرے پلائے جا رہے ہیں اور انہی ان کامیاب اور موثر کوششوں کے نتیجہ میں پشاور گذشتہ دو سالوں سے پولیو فری ہے، اس کامیابی کو برقرار رکھنے کے لئے تمام تر وسائل بروئے کار لائے جارہے ہیں۔

اسلام زیب خان نے کہا کہ رواں پولیو مہم کے دوران ضلع پشاور بھر میں 8لاکھ16ہزار 660 بچوں کو پولیو قطرے پلانے کا ہدف مقررکیا گیا ہے جس کے لئے تربیت یافتہ پولیو ورکرز پر مشتمل2533 ٹیمیں تشکیل دی گئی ہیں جن میں 2150موبائل،161فکسڈ،138ٹرانزٹ اور84رومنگ ٹیمیں شامل ہیں ۔ڈپٹی کمشنر پشاور نے پولیو کے خاتمہ کی کاوشوں میں معاشرے کے تمام طبقات خصوصا والدین کے بھرپورتعاون پر زور دیا۔