جعلی ادویات کے معاملے پر اپنا اثر و رسوخ استعمال کرنے کی اجازت نہیں دے سکتے، چیف جسٹس آف پاکستان

جمعرات 8 مارچ 2018 23:04

لاہور۔8 مارچ(اُردو پوائنٹ اخبارتازہ ترین - اے پی پی۔ 08 مارچ2018ء) سپریم کورٹ لاہور رجسٹری میں جعلی ادویات کیس میں چیف جسٹس آف پاکستان مسٹر جسٹس میاں ثاقب نثارنے ریمارکس دیئے کہ کسی کو جعلی ادویات کے معاملے پر اپنا اثر و رسوخ استعمال کرنے کی اجازت نہیں دے سکتے، تکلیف دہ بات ہے کہ جعلی ادویات کے معاملے پر کام نہیں ہوا۔ چیف جسٹس پاکستان مسٹر میاں ثاقب نثار کی سربراہی میں تین رکنی بنچ نے سماعت کی عدالتی حکم پر آئی جی پنجاب اور آرپی او بہاولپور راجہ رفعت مختار عدالت میں پیش ہوئے۔

(جاری ہے)

آئی جی پنجاب نے عدالت کو بتایا کہ آر پی او بہاولپور پر جعلی ادویات کے معاملے پر اپنے برادر نسبتی کی سپورٹ کا الزام غلط ہے۔ جس پر چیف جسٹس نے ریمارکس دیے کہ میری اطلاعات کے مطابق آر پی او نے اپنے برادر نسبتی کی سپورٹ کی۔ جعلی دوائی سے ایک آدمی اگر بیمار ہے تو بجائے اس کے کہ اسے شفا ہو، وہ مزید بیمار ہو جاتا ہے۔ چیف جسٹس نے ریمارکس دیئے کہ لگتا ہے یہ بہت طاقتور لوگ ہیں، ہمارے کہنے پر ایک افسر نے فیکٹری پر چھاپہ مارا، نیب نے کل اسے نوٹس جاری کر دیا ہے۔ عدالت نے ڈی جی ایف آئی اے جعلی ادویات پر تفتیش کر کے رپورٹ پیش کرنے کا حکم دیتے ہوئے سماعت ملتوی کردی۔