سپریم کورٹ نے پی ٹی آئی رہنما کی پولیس اہلکاروں کے ساتھ بدسلوکی ازخود نوٹس کیس نمٹا دیا

جمعہ 2 مارچ 2018 21:33

اسلام آباد ۔ (اُردو پوائنٹ اخبارتازہ ترین - اے پی پی۔ 02 مارچ2018ء) سپریم کورٹ نے سندھ کے علاقہ عمر کوٹ میں پی ٹی آئی کے رہنما نواب زید تالپواوران کے بیٹے کی جانب سے مقامی ایس ایچ اواوردیگراہلکاروں کے ساتھ بدسلوکی کرنے کے حوالے سے ازخود نوٹس کیس میں ملزمان کیخلاف پولیس کی کارروائی پرمبنی رپورٹ کوتسلی بخش قراردیتے ہوئے کیس نمٹا دیا ہے ۔

جمعہ کو چیف جسٹس میاں ثاقب نثار اور جسٹس اعجاز الاحسن پر مشتمل دو رکنی بینچ نے از خود نوٹس کیس کی سماعت کی۔

(جاری ہے)

یادرہے کہ نشے میں دھت باپ بیٹے نے پولیس کی گاڑی میں زبردستی بیٹھ کر تھانہ کنری کے ایس ایچ اوتصورجٹ اوردیگراہلکاروں کے ساتھ بدسلوکی کی انتہا کرتے ہوئے ان کوزمین پربیٹھنے کاحکم دیا تھا جس کے خلاف چیف جسٹس نے از خود نوٹس لیتے ہوئے آئی جی سندھ کو ملزمان کے خلاف کارروائی کرکے عدالت میں رپورٹ جمع کروانے کی ہدایت کی تھی ، سماعت کے دوران آئی جی سندھ کی جانب سے اس حوالے سے رپورٹ پیش کی گئی جس کے مطابق ملزم زیدتالپور اور حسن تالپور کے خلاف ایف آئی آر درج کرکے انہیں گرفتار کرنے کے ساتھ باپ بیٹے کے خلاف ٹرائل کورٹ میں چالان پیش کر دیا گیا جہاں ان پر فرد جرم عائد کر کے ٹرائل شروع کر دیا گیا ہے، عدالت نے رپورٹ پر اطمینان کا اظہار کرتے ہوئے کیس نمٹا دیا۔