کراچی میں 170 سالہ قدیم رہائشی عمارت کا مخدوش حصہ زمین بوس

ریسکیو اداروں نے امدادی کارروائیاں کرتے ہوئے عمارت میں پھنسے مکینوں کو باہر نکالا

اتوار 25 فروری 2018 17:30

کراچی(اُردو پوائنٹ اخبارتازہ ترین - این این آئی۔ 25 فروری2018ء) سول اسپتال کے نزدیک مخدوش قرار دی گئی 170 سالہ قدیم رہائشی عمارت کا ایک حصہ زمین بوس ہو گیا تاہم خوش قسمتی سے کوئی جانی نقصان نہیں ہوا اور مکینوں کو محفوظ مقام پر منتقل کردیا گیا۔کراچی میں سول اسپتال کے قریب 3 منزلہ کلکتہ بلڈنگ کا بوسیدہ حصہ اچانک گر گیا جس کے باعث مکین عمارت کے اندر پھنس گئے۔

ریسکیو اداروں نے امدادی کارروائیاں کرتے ہوئے اندر پھنسے مکینوں کو باہر نکالا۔ اس موقع پر کسی بھی ناخوشگوار واقعہ سے نمٹنے کے لیے پولیس کی نفری بھی موجود رہی۔ واقعے میں کسی کے زخمی ہونے کی اطلاع نہیں ملی۔پولیس کے مطابق170سالہ پرانی عمارت تاریخی اہمیت رکھتی ہے اور اس میں 18 فلیٹس قائم ہیں۔ عمارت کے ایک حصے کی حالت انتہائی مخدوش تھی جس کی وجہ سے بلڈنگ کنٹرول اتھارٹی نے اسے خالی کرنے کے لیے نوٹس بھی بھیجا گیا تھا تاہم مکینوں نے گھر خالی کرنے سے منع کردیا تھا اور آج یہ افسوسناک واقعہ رونما ہو گیا ہے جس کے بعد مکینوں کو محفوظ مقام پر منتقل کیا گیا۔

(جاری ہے)

واضح رہے کہ کراچی کے اولڈ سٹی ایریا میں برطانوی راج کے دوران تعمیر کردہ کئی عمارتیں موجود ہیں جو اپنے فن تعمیر اور مخصوص مگر دلکش انداز کے باعث اپنی مثال آپ ہیں تاہم ان میں سے اکثر عمارتیں مخدوش ہو چکی ہیں لیکن حکومت کی جانب سے ان تاریخی عمارتوں کو محفوظ کرنے کے لیے سنجیدہ کاوشیں نظر نہیں آرہی ہیں جس کے باعث ہم اپنی تاریخ کے واقعاتی مظاہر سے محروم ہوتے جارہے ہیں۔

متعلقہ عنوان :