واشنگٹن میں گاڑی رکاوٹ سے جاٹکرائی، وائٹ ہاوس بند کر دیا گیا

واشنگٹن(اُردو پوائنٹ اخبارتازہ ترین - این این آئی۔ 24 فروری2018ء) واشنگٹن میں گاڑی وائٹ ہائوس کی رکاوٹ سے جاٹکرائی جس کے بعد وائٹ ہاوس بند کر دیا گیاجبکہ گاڑی میں سوار خاتون ڈرائیور کو حراست میں لے کر تفتیش شروع کر دی گئی ۔امریکی میڈیا کے مطابق وائٹ ہائوس کے قریب ایک منی وین سیکورٹی رکاوٹ سے ٹکرا گئی جس کے باعث وائٹ ہاوس کو بند کر دیا گیا کیوں کہ وائٹ ہاوس میں امریکی صدر اور آسٹریلوی وزیراعظم موجود تھے۔

(جاری ہے)

امریکی پولیس کا کہنا تھا کہ گاڑی نے وائٹ ہاوس کا سیکورٹی حصار نہیں توڑا جبکہ گاڑی میں ایک ہی مسافر سوار تھا۔سیکرٹ سروس کے مطابق گاڑی ٹکرانے کے واقعہ میں کوئی اہل کار زخمی نہیں ہوا۔عینی شاہدین نے دعویٰ کیا کہ پولیس اہلکاروں کی جانب سے گاڑی پر فائرنگ کی گئی تاہم پولیس نے فائرنگ کی اطلاعات کو بے بنیاد قرار دیا ہے۔پولیس اور سیکرٹ سروس جائے وقوعہ پر پہنچ گئی اور واقعہ کی تفتیش جاری ہے جبکہ منی وین کے پچھلے حصے پر امریکی جھنڈا لگا ہوا تھا۔