مسلم لیگ (ن)سینٹ انتخابات سے آئوٹ ،ْ الیکشن کمیشن نے نوازشریف کے بعد راجہ ظفر الحق کے دستخط سے جاری کر دہ ٹکٹس مستر د کر دیئے

اسلام آباد (اُردو پوائنٹ اخبارتازہ ترین - این این آئی۔ 22 فروری2018ء) الیکشن کمیشن نے نوازشریف کے بعد مسلم لیگ (ن)کے چیئر مین راجہ ظفر الحق کے دستخط سے امیدواروں کو ٹکٹس جاری کر نے کی درخواست مسترد کرتے ہوئے مسلم لیگ (ن)کے امیدوار کو آزاد ڈکلیئر کر دیا ہے ۔ تفصیلات کے مطابق سپریم کورٹ نے گزشتہ روز انتخابی اصلاحات ایکٹ 2017ء کیس کے فیصلے میں سابق وزیر اعظم محمد نوازشریف کو پارٹی صدارت کیلئے نااہل دیتے ہوئے ان کے بطور پارٹی صدر کیے گئے فیصلوں کو بھی کالعدم قرار دیاجس کے بعد نوازشریف کے بطور پارٹی صدر سینیٹ انتخابات کیلئے امیدواروں کو دیئے گئے ٹکٹس بھی منسوخ ہوگئے تاہم جمعرات کو مسلم لیگ (ن) نے سینیٹ انتخابات کے حوالے سے اہم فیصلہ کیا اور پارٹی چیئرمین راجہ ظفر الحق کے دستخط سے امیدواروں کو ٹکٹس جاری کیے گئے ا س سلسلے میں راجہ ظفر الحق نے الیکشن کمیشن کے دفتر جاکر امیدواروں کے فارمز پر دستخط کیے ۔

(جاری ہے)

الیکشن کمیشن کے دفتر کے باہر میڈیا سے گفتگو کرتے ہوئے راجہ ظفر الحق نے کہا کہ کل کے فیصلے کے بعد چیف الیکشن کمشنر سے ملاقات ضروری سمجھی، الیکشن کمیشن میں میرے نام سے امیدواروں کے پارٹی ٹکٹس جمع کرا دیئے ہیں، صدر یا چیئرمین پارٹی ٹکٹ جاری کرسکتا ہے۔نجی ٹی وی کی رپورٹ کے مطابق بعد ازاں چیف الیکشن کمشنر سردار محمد رضا کی سربراہی میں ہونے والے اجلاس میں الیکشن کمیشن کے ارکان، سیکرٹری ، چاروں صوبائی الیکشن کمشنرز، ڈی جی لاء اور دیگر اعلیٰ حکام نے شرکت کی۔

اجلاس میں مسلم لیگ (ن) کے سینیٹ امیدواروں کی قانونی حیثیت پر غور کیا گیا۔ صورتحال کا جائزہ لینے کے بعد الیکشن کمیشن نے سپریم کورٹ کے حکم پر عملدرآمد کرتے ہوئے ن لیگ کے نمائندوں کو آزاد امیدوار قرار دیدیا اس فیصلے کے نتیجے میں مسلم لیگ (ن) سیاسی جماعت کی حیثیت سے سینیٹ الیکشن سے آؤٹ ہوگئی تاہم الیکشن کمیشن نے مسلم لیگ (ن)کے امیدواروں کو آزاد حیثیت میں الیکشن لڑنے کی اجازت دیتے ہوئے کہا کہ سینٹ انتخابات کے حوالے سے جار ی کر دہ شیڈول تبدیل نہیں ہوگا ۔

الیکشن کمیشن کی جانب سے بتایا گیا کہ یہ فیصلہ سپریم کورٹ کے حکم کی روشنی میں کیا گیاجبکہ ضمنی انتخاب کے لیے بھی (ن) لیگ کے امیدوار کو آزاد قرار دیا گیا ہے۔الیکشن کمیشن کی جانب سے دو صفحات پر مشتمل فیصلہ کہا گیا کہ تمام ریٹرننگ آفسرز مسلم لیگ (ن)کے امیدوار وں کو آزاد تصور کریں ۔ذرائع کے مطابق الیکشن کمیشن کے اجلاس میں 4 آپشنز پر غور کیا گیا ،ْ کمیشن نے سینیٹ انتخابات کو ملتوی کرنے، (ن )لیگ کے امیدواروں کو آزاد امیدوار قرار دینے، نیا پارٹی ٹکٹ جاری کرنے کیلئے وقت دینے اور امیدواروں کی قانونی حیثیت پر سپریم کورٹ سے رہنمائی لینے کے آپشنز پر غور کیا گیا۔

الیکشن کمیشن کے فیصلے میں کہاگیا کہ دوسری جماعتوں کے امیدواروں کو متاثر نہیں کر ناچاہتے ،ْ فیصلے کے اطلاق سینٹ انتخابات ،ْ پی پی 30اور پی ایس 7پر بھی ہوگا ۔