پاکستان تابکار مواد کی درآمد و برآمد سے متعلق گائیڈ لائنز اور قواعد و ضوابط پر رضاکارانہ عملدرآمد کر رہا ہے

ترجمان دفتر خارجہ ڈاکٹر محمد فیصل کی عالمی ادارہ برائے جوہری توانائی کو یقین دہانی

بدھ 21 فروری 2018 20:27

اسلام آباد (اُردو پوائنٹ اخبارتازہ ترین - این این آئی۔ 21 فروری2018ء) پاکستان نے عالمی ادارہ برائے جوہری توانائی(آئی اے ای ای) کو یقین دہانی کراتے ہوئے کہا ہے کہ وہ تابکار مواد کی درآمد و برآمد سے متعلق گائیڈ لائنز اور قواعد و ضوابط پر رضاکارانہ عملدرآمد کر رہا ہے۔

(جاری ہے)

بدھ کو دفتر خارجہ کے ترجمان ڈاکٹر محمد فیصل نے کہا کہ پاکستان 2005ء سے قواعد و ضوابط پر رضاکارانہ عملدرآمد کر رہا ہے ، کوڈ کی سفارشات اور جدید ترین عالمی معیارات کے مطابق ایٹمی عدم پھیلائو، تحفظ اور سیکورٹی کیلئے تمام ضروری انتظامات کر رکھے ہیں۔

ترجمان نے کہا کہ پاکستان کی تابکار مواد کی درآمد و برآمد سے متعلق ضمنی گائیڈ لائنز کی تائید ہمارے مسلسل عزم کی عکاس ہے۔ ترجمان نے کہا ہے کہ گزشتہ چار دہائیوں سے بھی زیادہ پاکستان کا محفوظ پرامن ایٹمی پروگرام جاری ہے جبکہ گزشتہ کئی سالوں سے پاکستانی ماہرین نے بھی نیوکلیئر تحفظ اور سیکورٹی کے شعبوں میں عالمی ادارہ برائے جوہری توانائی کے کام میں کردار ادا کیا ہے۔