نواز شریف کیخلاف توہین عدالت کی درخواست پر سماعت بغیر کارروائی کے ملتوی

اسی نوعیت کی درخواست لاہور ہائیکورٹ میں بھی زیرسماعت ہے، پہلے اس کے احکامات کا انتظار کرلیتے ہیں کہ وہاں کیا ہوتا ہے، جسٹس عامر فاروق کے جسٹس کے ریمارکس

منگل 20 فروری 2018 15:20

اسلام آباد(اُردو پوائنٹ اخبارتازہ ترین - آئی این پی۔ 20 فروری2018ء) اسلام آباد ہائیکورٹ نے سابق وزیراعظم نواز شریف کے خلاف توہین عدالت اور ان کی تقاریر پر پابندی کی درخواست کو لاہور ہائیکورٹ میں اسی نوعیت کی درخواست زیر سماعت ہونے کے باعث 26 فروری کو سماعت کے لیے مقرر کردیا۔ منگل کو اسلام آباد ہائی کورٹ کے جسٹس عامر فاروق نے ایک مقامی وکیل مخدوم نیاز کی جانب سے نواز شریف کے خلاف توہین عدالت اور تقاریر پر پابندی کی درخواست پر سماعت کی۔

(جاری ہے)

جسٹس عامر فاروق نے ریمارکس دیئے کہ اسی نوعیت کی درخواست لاہور ہائیکورٹ میں بھی زیرسماعت ہے، پہلے لاہور ہائیکورٹ کے احکامات کا انتظار کرلیتے ہیں کہ وہاں کیا ہوتا ہے۔جس کے بعد عدالت عالیہ نے درخواست کو 26 فروری کے لیے مقرر کرتے ہوئے سماعت ملتوی کردی۔ واضح رہے ایڈووکیٹ مخدوم نیاز انقلابی کی جانب سے دائر کی گئی درخواست میں سیکریٹری اطلاعات اور چیئرمین پیمرا کو بھی فریق بنایا گیا ہے۔درخواست گزار کی جانب سے موقف اپنایا گیا ہے کہ نواز شریف نے ججز کی کردار کشی کو اپنا وتیرہ بنایا ہوا ہے، لہذا عدالت سے استدعا ہے کہ سابق وزیراعظم کی تقاریر براہ راست نشر کرنے پر پابندی لگائی جائے۔