چیف جسٹس کا جناح ہسپتال کراچی کا دورہ ‘ناقص سہولیات پر اظہار برہمی

کراچی(اردوپوائنٹ اخبارتازہ ترین-انٹرنیشنل پریس ایجنسی۔17 فروری۔2018ء) سندھ میں ہسپتالوں کی صورتحال کاجائزہ لینے کے لیے چیف جسٹس نے جناح ہسپتال کراچی کا دورہ کیا۔چیف جسٹس نے ہسپتال کے دورے کے دوران پر مریضوں کو دی جانے والی سہولتوں کا معائنہ کیا اور ہسپتال کے انتظامات کا بھی جائزہ لیا۔ اس موقع پر انہوں نے ہسپتال کے مختلف شعبہ جات کا بھی دورہ کیا۔

سندھ میں ہسپتالوں کی ابتر صورتحال پر ازخود نوٹس کیس کی سماعت چیف جسٹس پا کستان جسٹس ثاقب نثار کی سربراہی میں آج سپریم کورٹ کراچی رجسٹری میں ہوئی۔کیس کی سماعت کے دوران چیف جسٹس نے جناح ہسپتال کی میڈیکل سپریٹنڈنٹ ڈاکٹر سیمی جمالی سے استفسار کیا کہ کہیں یہ وہ جناح ہسپتال تو نہیں جہاں جیل سے خاص ملزمان کورکھا جاتا ہے؟ کیس کی سماعت کرتے ہوئے چیف جسٹس نے کل جناح ہسپتال جانے کااعلان کیا تاہم انہوں نے اس فیصلے کو تبدیل کرتے ہوئے دوران سماعت آج ہی جناح ہسپتال جانے کا ارادہ کرلیا۔

(جاری ہے)

چیف جسٹس نے ریمارکس دیتے ہوئے کہا کہ انہیں ازخود نوٹس لینے کاشوق نہیں، ایک سال خاموش رہاجب دیکھا لوگوں کا کوئی پرسان حال نہیں تو پھرسوموٹو ایکشن لیے۔ انہوں نے مزید کہا کہ معلوم ہے بعد میں نتیجہ کیا ہوسکتا ہے۔سماعت کے دوران چیف جسٹس نے کہا کہ سینئر وکلا سے کہتا ہوں کہ بنیادی حقوق پر درخواستیں دائر کریں۔