سوشل میڈیا پر وکلاء کیخلاف منظم مہم چلانے والے افراد کی تحقیقات کیلئے ایف آئی اے کو درخواست

ڈائریکٹر ایف آئی اے شکیل درانی نے درخواست سائبر کرائم سیل کو بھجواتے ہوئے تحقیقات کے حکم دیدیا

بدھ 14 فروری 2018 23:30

اسلام آباد (اُردو پوائنٹ اخبارتازہ ترین - آن لائن۔ 14 فروری2018ء) سوشل میڈیا پر وکلائ کے خلاف منظم مہم چلانے والے افراد کے خلاف ڈسٹرکٹ بار ایسوسی ایشن اسلام آباد کے وکلائ نے وفاقی تحقیقاتی ادارہ ( ایف آئی اے ) کو تحقیقات کے لئے درخواست دے دی۔ ڈائریکٹر ایف آئی اے شکیل درانی نے درخواست سائبر کرائم سیل کو بھجواتے ہوئے تحقیقات کے حکم دے دیا۔

وکلائ ( آج ) جمعرات کو ایف آئی اے حکام کے سامنے پیش ہوں گے۔

(جاری ہے)

بدھ کو ایف آئی اے ذرائع کے مطابق ڈسٹرکٹ بار ایسوسی ایشن اسلام آباد کے وکیل فیصر جدون ایڈووکیٹ سمیت 250سے زائد وکلائ نے درخواست دیتے ہوئے موقف اختیار کیا کہ سوشل میڈیا ( فیس بک ) پر ایک پیج چلایا جا رہا ہے جس میں وکلائ کے خلاف نازیبا الفاظ استعمال کئے جا رہے ہیں اور وکلائ کے خلاف پروپیگنڈا کیا جا رہا ہے ، اس کی تحقیقات کر کے ملزمان کے خلاف قانونی کارروائی کی جائے تا کہ وکالت کے پیشے کے تقدس کو برقرار رکھا جا سکے۔

ڈائریکٹر ایف آئی اے اسلام آباد شکیل درانی نے درخواست سائبر کرائم سیل کو بھجوا دی۔ سائبر کرائم سیل کے انسپکٹر فاروق لطیف معاملے کی انکوائری کے لئے ( آج ) جمعرات کو وکلائ کے بیان ریکارڈ کریں گے۔