کراچی، انتظار احمد قتل کی تحقیقات کے لیے ثناء اللہ عباسی کی زیر صدارت نئی جے آئی ٹی تشکیل

پیر 12 فروری 2018 21:19

کراچی(اُردو پوائنٹ اخبارتازہ ترین - آن لائن۔ 12 فروری2018ء) کراچی کے علاقے ڈیفنس میں گزشتہ ماہ اینٹی کار لفٹنگ سیل کے اہلکاروں کی فائرنگ سے جاں بحق ہونے والے نوجوان انتظار احمد کے قتل کی تحقیقات کے لیے ثناء اللہ عباسی کی زیر صدارت نئی جے آئی ٹی تشکیل دے دی گئی ہے۔ انتظار احمد کے والد اشتیاق احمد نے وزیراعلیٰ ہاؤس میں وزیراعلیٰ سندھ سید مراد علی شاہ سے ملاقات کی جس میں انہوں نے اپنے بیٹے انتظار احمد کے قتل کی تحقیقات کے لیے نئے سرے سے انکوائری کمیٹی قائم کرنے کی درخواست کی۔

وزیراعلیٰ سندھ نے اشتیاق احمد کو انتظار قتل کیس کی تحقیقات کے لیے اعلیٰ سطحی کمیٹی بنانے کی یقین دہانی کرائی جس کے بعد وزارت داخلہ سندھ نے انتظار قتل کیس کی تحقیقات کے لیے 6 رکنی جے آئی ٹی تشکیل دینے کا نوٹیفکیشن بھی جاری کر دیا ہے۔

(جاری ہے)

وزارت داخلہ سندھ کی جانب سے جاری اعلامیے کے مطابق اے آئی جی کاؤنٹر ٹیررازم ڈپارٹمنٹ ثناء اللہ عباسی کی سربراہی میں تحقیقاتی کمیٹی قائم کر دی گئی ہے جس میں ڈی آئی جی ساؤتھ زون آزاد خان سمیت رینجرز، سندھ پولیس، آئی بی، آئی ایس آئی اور ایم آئی کے افسران بھی شامل ہیں۔

نوٹیفکیشن کے مطابق جے آئی ٹی انتظار احمد قتل کیس کے حوالے سے 15 روز میں اپنی تحقیقاتی رپورٹ وزارت داخلہ کو ارسال کرے گی جس کی بنیاد پر کیس کی کارروائی کو مزید آگے بڑھایا جائے گا۔خیال رہے کہ 13 جنوری کو اے سی ایل سی کے اہلکاروں نے کراچی کے علاقے ڈیفنس میں فائرنگ کر کے انتظار احمد نامی نوجوان کو قتل کر دیا تھا۔#