وزیر خارجہ خواجہ محمد آصف کا عاصمہ جہانگیر کو خراج عقیدت پیش، ان کا انتقال ملک کے لئے بڑا نقصان قرار

جنرل پرویز مشرف نے نومبر 1999ء میں ہمیں گرفتار کر کے جیل میں ڈالا ، سب سے پہلی آواز عاصمہ جہانگیر نے اٹھائی تھی، انہوں نے ہمیشہ مظلوم طبقات کے لئے بلا امتیاز آواز اٹھائی، وہ ایک عظیم عورت تھیں،خواجہ محمد آصف

پیر 12 فروری 2018 19:10

وزیر خارجہ خواجہ محمد آصف کا عاصمہ جہانگیر کو خراج عقیدت پیش، ان کا ..

اسلام آباد ۔ (اُردو پوائنٹ اخبارتازہ ترین - اے پی پی۔ 12 فروری2018ء) وزیر خارجہ خواجہ محمد آصف نے عاصمہ جہانگیر کو خراج عقیدت پیش کرتے ہوئے ان کے انتقال کو ملک کے لئے ایک بڑا نقصان قرار دیا ہے اور کہا ہے کہ عاصمہ جہانگیر نے ہمیشہ ہر مرحلے پر آئین اور پارلیمنٹ کا دفاع کیا۔ پیر کو قومی اسمبلی کے اجلاس کے آغاز پر پیپلزپارٹی کے پارلیمانی لیڈر سید نوید قمر نے کہا کہ عاصمہ جہانگیر ایسی شخصیت تھیں کہ ان کے لئے تعزیتی قرارداد منظور ہونی چاہیے جس پر وزیر خارجہ خواجہ محمد آصف نے کہا کہ 1960ء کی دہائی میں ان کے والد رکن قومی اسمبلی تھے جنہوں نے جمہوریت کے لئے جدوجہد کی اور قربانیاں دیں، یعنی ان کے خاندان کی جدوجہد 60 سالوں پر محیط ہے۔

عاصمہ جہانگیر نے بھی اپنے والد کی جدوجہد کو جاری رکھا۔

(جاری ہے)

انہوں نے کہا کہ جب جنرل پرویز مشرف نے نومبر 1999ء میں ہمیں گرفتار کر کے جیل میں ڈالا تو سب سے پہلی آواز عاصمہ جہانگیر کی تھی۔ انہوں نے ہمیشہ مظلوم طبقات کے لئے بلا امتیاز آواز اٹھائی، وہ ایک عظیم عورت تھیں۔ انہوں نے کہا کہ نظریاتی اختلافات ضرور ہوتے ہیں تاہم ان کی جدوجہد پر خراج عقیدت پیش کرنے کے لئے قرارداد آنی چاہیے کیونکہ انہوں نے زندگی کے ہر مرحلے میں پارلیمنٹ اور آئین کا ہمیشہ دفاع کیا۔ پی ٹی آئی کے رکن ڈاکٹر عارف علوی، شیخ صلاح الدین اور دیگر ارکان نے بھی عاصمہ جہانگیر، قاضی واجد اور دیگر مرحومین کو خراج عقیدت پیش کیا۔