سارہ علی کو ہیروئن بنانے کی ہریتھک کی خواہش مکمل نہ ہوسکی

ممبئی (اُردو پوائنٹ اخبارتازہ ترین - این این آئی۔ 09 فروری2018ء) بالی ووڈ کی آنے والی فلم’ ’سپر تھرٹی‘‘ کا سب کو ہی انتظار ہے، جس میں ہریتھک روشن بھارت کے معروف ماہر ریاضیات آنند کمار کے روپ میں نظر آئیں گے۔اگرچہ اس فلم کی شوٹنگ کافی عرصے سے جاری ہے، اور 2 دن قبل ہی اس کی پہلی جھلک جاری کی گئی تھی، تاہم تاحال اس فلم کی مرکزی اداکارہ کا اعلان نہیں کیا گیا۔

خبریں تھیں کہ 44 سالہ ہریتھک روشن چاہتے ہیں کہ اداکار سیف علی خان کی 25 سالہ بیٹی سارہ علی خان ’سپر تھرٹی‘ میں ان کی ہیروئن بنیں۔ہریتھک روشن نے اپنی اس خواہش کا اظہار فلم ساز وکاس بہل سے بھی کیا تھا، تاہم سارہ علی خان کو کاسٹ کیے جانے کی تصدیق نہیں ہوسکی تھی۔گزشتہ روز 7 فروری کو سارہ علی خان کا بھی ایک بیان سامنے آیا، جس میں انہوں نے صرف اور صرف فرسٹ کلاس اداکاروں کے ساتھ فلمیں کام کرنے کے عزم کا اعادہ کیا۔

(جاری ہے)

دکن کیرونیکل کے مطابق سارہ علی خان چاہتی ہیں کہ وہ ہریتھک روشن اور شاہد کپور جیسے فرسٹ کلاس اداکاروں کی ہیروئن بنیں۔اگرچہ ان کی پہلی فلم ’کیدر ناتھ‘ بھی ابھی ریلیز نہیں ہوئی، تاہم اطلاعات ہیں کہ انہیں کئی فلم ساز فلموں میں کاسٹ کرنا چاہتے ہیں، تاہم وہ نئے اداکاروں کے بجائے منجھے ہوئے ہیروز کی ہیروئن بنا چاہتی ہیں۔تاہم ہریتھک روشن اور سارہ علی خان کی خواہشوں کے برعکس اب یہ خبر سامنے آئی ہے کہ فلم ’سپر 30‘ میں ٹی وی اداکارہ 25 سالہ مرنال ٹھاکر کو کاسٹ کرلیا گیا۔ہدایت کار ویکاس بہل کی اس فلم کو 23 نومبر 2018 کو ریلیز کیے جانے کا امکان ہے۔دو دن قبل ہی اس فلم کی پہلی جھلک جاری کی گئی، جس میں صرف ہریتھک روشن کو دکھایا گیا تھا۔