حج اسلام کا اہم رکن ہے اس لئے اسے بہت اہمیت دیتے ہیں

مکہ مکرمہ ۔ (اُردو پوائنٹ اخبارتازہ ترین - اے پی پی۔ 02 فروری2018ء) حج اسلام کا اہم رکن ہے اس لئے اسے بہت اہمیت دیتے ہیں۔ یہ بات وفاقی وزیر مذہبی امور سردار محمد یوسف نے جنوب ایشیائی ممالک کے حج انتظامات کرنے والے ادارے مؤسسہ جنوب ایشیاء کے چیئرمین رافع بدر سے ملاقات کے دوران کہی۔ سردار یوسف جمعہ کو ایک وفد کے ہمراہ مکہ مکرمہ میں قائم سعودی ادارے مؤسسہ جنوب ایشیا ئ میں حج معاہدات کیلئے پہنچے۔

حج معاہدات سے متعلق اہم اجلاس میں انہوں نے کہا کہ آج ہم یہاں حجاج کی خدمت کے نیک مقصد کیلئے اکھٹے ہوئے ہیں۔ حج اسلام کا اہم رکن ہے اس لئے اسے بہت اہمیت دیتے ہیں۔ حرمین شریفین کی بہترین خدمت سعودی حکومت کا طرہء امتیاز ہے۔ پاکستانی عوام نے بھی سعودی حکومت کی کوششوں کی تعریف کی ہے۔

(جاری ہے)

پچھلے سالوں کے کامیاب حج دونوں طرف کی ٹیموں کی مشترکہ کاوشوں کا نتیجہ ہے۔

وفاقی وزیر کا کہنا تھا کہ وزارت کی کوشش رہی ہے کہ سرکاری اور پرائیویٹ کے فرق کے بغیر حجاج کی خدمت کرے۔ پاکستانی عوام میں حج کا بہت جذبہ ہے لیکن ہمارا کوٹہ آبادی کے لحاظ سے نہیں۔ انہوں نے بتایا کہ ان کے دور میں 4 حج آپریشن کامیابی سے ہوئے جبکہ اس سال پونے چار لاکھ درخواستیں وصول ہوئیں۔ کسی حکومت کی پالیسی اس وقت تک کامیاب نہیں ہو سکتی جب تک اس پر مکمل عمل درآمد نہ ہو۔

پاکستانی حجاج کیلئے انتظامات کو مزید بہتر کرنے کی تجاویز دیتے ہوئے انہوں نے کہا کہ پاکستانی حجاج کے اطمینا ن کے لئے مشاعر کے دنوں میں کھانے کیلئے پاکستانی کیٹرنگ کمپنی کو اجازت دی جائے۔ پاکستانی حجاج کو ایک ہی کلسٹر میں منیٰ کے مکاتب دینے اور ٹرین ٹکٹ ملنے سے کافی مسائل حل ہو سکتے ہیں۔ کوشش کی جائے کہ پاکستانی حجاج کو 100 فیصد ٹرین کا ٹکٹ دیا جائے۔

منیٰ میں جگہ کی کمی کو پورا کرنے کیلئے مزید بہتر انتظام کیا جائے۔ وفاقی وزیر نے کہا کہ منیٰ کے تمام مکاتب میں پاکستانی معاونین کو جانے اور کام کرنے کی خصوصی اجازت ہونی چاہئے۔ ہماری دٴْعا ہے کہ پچھلے سالوں کی طرح حج آپریشن 2018 بھی کامیاب ہو۔ چیئرمین مؤسسہ جنوب ایشیاء رافع بدرنے کہا کہ پرائیوٹ ٹور آپریٹرز کو مانیٹر کرنے کیلئے حج مشن میں ایک آفس ہونا چاہئے۔

ای حج کیلئے سعودی محکمے مکمل تیار ہیں۔ دفتر امورِ حجاج پاکستان کیٹرنگ اور ٹرانسپورٹ کمپنیوں کی تعداد بڑھائی جائے تاکہ مقابلے کی فضائ میں حجاج کی بہتر خدمت ہو سکے۔ چیئرمین مؤسسہ نے سردار یوسف سے کہا کہ آپ کے دور میں حجاج کی بہترین خدمت پر آپ کو مبارکباد پیش کرتا ہوں۔ آپ کا حج مشن حجاج کی خدمت پوری لگن کے ساتھ کر رہا ہے۔ پچھلے سال کچھ مشکلات آئی تھیں مگر پھر بھی سب نے مل کر کام کیا تھا۔

گذشتہ سال آپ کی کوششوں سے پرائیویٹ ٹور آپریٹرز کی بھی کوئی شکایت سامنے نہیں آئی۔ ہم کوشش کر رہے ہیں کہ پاکستانی حجاج کو منیٰ مکاتب 4 سال کیلئے الاٹ کریں تاکہ معاونین کی مشکلات کم ہوں۔ پاکستانی وفد میں وفاقی سیکرٹری مذہبی امور خالد مسعود چوہدری، ڈی جی حج ڈاکٹر ساجد یوسفانی، ڈائریکٹر حج سید امتیاز شاہ، ڈائریکٹر آئی ٹی جمیل احمد ، ڈائریکٹر میڈیا عمران صدیقی کے علاوہ حج گروپ آرگنائزرز کے نمائندے شامل تھے۔