کراچی چیمبر کا ڈی ایم سی جنوبی کی جانب سے ٹریڈ لائسنس فیس میں اضافہ واپس لینے کے اعلان کاخیرمقدم

بدھ 31 جنوری 2018 23:04

کراچی (اُردو پوائنٹ اخبارتازہ ترین - این این آئی۔ 31 جنوری2018ء) کراچی چیمبر آف کامرس اینڈ انڈسٹری ( کے سی سی آئی) کے صدر مفسر عطا ملک نے چیئرمین ڈی ایم سی جنوبی ملک محمد فیاض کی جانب سے کے سی سی آئی کے حالیہ دورے کے موقع پر ٹریڈ لائسنس فیس میں اضافہ واپس لینے کی یقین دہانی کا خیرمقدم کرتے ہوئے امید ظاہر کی ہے کہ 3جنوری 2018کو ڈی ایم سی جنوبی کی جانب سے ٹریڈ لائسنس فیس میں اضافے کا نوٹیفیکشن واپس لیتے ہوئے لائسنس فیس میں کمی کا نوٹیفیکیشن جلد جاری کیا جائے گا ۔

ایک بیان میں مفسر ملک نے کہاکہ کراچی چیمبر نے سب سے پہلے اس مسئلے پر ڈی ایم سی جنوبی کے سامنے کے سی سی آئی کے دورے کے موقع پر مؤثر انداز میں آواز بلند کی اور یہ بات حوصلہ افزا ہے کہ ملک فیاض نے چھوٹے تاجروں اور دکانداروں کی شکایات کا مثبت جواب دیتے ہوئے ٹریڈلائسنس کی مد میں بڑھائی گئی فیس جلد از جلد واپس لینے کی یقین دہانی کروائی ۔

(جاری ہے)

انہوںنے کہاکہ مذکورہ اجلاس میں ضلع جنوبی کی تمام مارکیٹوں کے نمائندوں نے شرکت کی جنہوں نے مختلف مسائل کو تفصیل سے سننے اور حل کرنے کی یقین دہانی پر ڈی ایم سی جنوبی کو سراہا ۔اجلاس میں تجارتی مارکیٹوں میں صفائی ، سڑکوں کی مرمت اور اسٹریٹ لائٹس کی تنصیب سمیت دیگر عوامی مسائل پر تفصیلی تبادلہ خیال کیا۔کے سی سی آئی کے صدر نے امید ظاہر کی کہ تمام ٹیکسوں سمیت بورڈ اور سن شیڈ کی فیسوں سے متعلق تفصیلات سے عوام کو آگاہ کرنے کے لیے ڈی ایم سی جنوبی کی ویب سائٹ پر تشہیر کرنے پر غور کیا جائے گا جس سے تاجروں، دکانداروں کو متعلقہ افسروں کی جانب سے ہراساں کرنے جیسے مسائل سے نمٹنے میں مدد ملے گی جو ان ٹیکسوں کی وصولی کے ذمہ دار ہیں۔

انہوں نے کہاکہ ضلع جنوبی کے تاجروں اور دکانداروں کو مختلف سماجی مسائل کا سامنا ہے جس پر توجہ دینے کی ضرورت ہے۔ ان سماجی مسائل سے مؤثر طریقے سے نمٹنے کے علاوہ ڈی ایم سی جنوبی کو بڑھتے تجاوزات کے خلاف بھی سخت کارروائی کرنے کی ضرورت ہے جس کی وجہ سے دکانداروں کے لیے بہت زیادہ مسائل پیدا ہوگئے ہیں جبکہ ضلع جنوبی کی تمام مارکیٹوں میں ٹریفک جام بھی معمول بن گیا ہے۔

مفسر ملک نے کہاکہ کراچی چیمبر نے تاجروصنعتکار برادری کا حقیقی نمائندہ ہونے کی حیثیت سے ہمیشہ مختلف مسائل خاص طور پر چھوٹے تاجروں اور دکانداروں کو درپیش مسائل کے ازالے کے لیے بھرپورآواز بلند کی ۔ بی ایم جی کے رہنماؤں کی’’ عوامی خدمت ‘‘ کی واضح پالیسی کے تحت کوئی بھی تاجر وصنعتکار ،چھوٹے تاجر جنہیں کے سی سی آئی مدد درکار ہوکراچی چیمبر کاروباری سائز کے قطع نظر اُن کی مکمل طور پر مدد کرتا ہے ۔

متعلقہ عنوان :