وزیراعظم شاہد خاقان عباسی سے ٹیلی نار کے چیف ایگزیکٹو آفیسر کی ملاقات

بدھ 24 جنوری 2018 21:52

ڈیووس ۔ (اُردو پوائنٹ اخبارتازہ ترین - اے پی پی۔ 24 جنوری2018ء) وزیراعظم شاہد خاقان عباسی سے ٹیلی نار کے چیف ایگزیکٹو آفیسر نے عالمی اقتصادی فورم کے موقع پر ملاقات کی۔ وزیراعظم کے معاون خصوصی علی جہانگیر صدیقی اور سینئر سرکاری حکام بھی اس موقع پر موجود تھے۔ وزیراعظم نے پاکستان میں بالواسطہ اور بلاواسطہ تقریباً ایک لاکھ 30 ہزار پاکستانیوں کیلئے روزگار کے مواقع فراہم کرنے پر ٹیلی نار کو سراہا اور افرادی قوت کی تربیت و ترقی کے شعبہ میں سرمایہ کاری کی تعریف کرتے ہوئے چیف ایگزیکٹو آفیسر ٹیلی نار کا شکریہ ادا کیا۔

وزیراعظم نے اسلام آباد میں ٹیلی نار کے نئے ہیڈ کوارٹر کے افتتاح کا حوالہ دیتے ہوئے کہا کہ اس نے پاکستان میں کام کرنے کے ماحول کیلئے نئے معیارات قائم کئے ہیں۔

(جاری ہے)

ٹیلی نار کے چیف ایگزیکٹو آفیسر نے پاکستان میں ٹیلی نار کے آپریشن میں سہولت فراہم کرنے پر وزیراعظم کا شکریہ ادا کیا اور اس امید کا اظہار کیا کہ پاکستانی ورک فورس کو جدید ترین ٹیلی کام ٹیکنالوجیز میں تربیت کی فراہمی سمیت ٹیلی نار اپنے آپریشنز کو مزید وسعت دے گا۔

انہوں نے کہا کہ ٹیلی نار پاکستان میں آزادانہ پالیسی کے ماحول میں سرمایہ کاری کے نئے مواقع تلاش کرنے کا خواہاں ہے، پاکستان میں سرمایہ کاری کیلئے معاون ریگولیٹری رجیم سے مزید سہولیات میسر آئی ہیں۔ واضح رہے کہ ٹیلی نار 2005ء سے پاکستان میں آپریٹ کر رہا ہے اور اس نے ایزی پیسہ کے نام سے موبائل فنانشل ٹرانزیکشن کا نظام بھی متعارف کرایا ہے۔ ٹیلی نار اب تک پاکستان میں 3.5 ارب ڈالر سے زائد کی سرمایہ کاری کر چکا ہے۔