افغان طالبان نے اسلام آباد میں پاکستانی حکام سے ملاقات کی باضابطہ تصدیق کردی

ملک میں جاری تشدد کو بات چیت کے ذریعے ختم کرنے کا خواہاں ہیں،طالبان ترجمان

بدھ 24 جنوری 2018 18:02

افغان طالبان نے اسلام آباد میں پاکستانی حکام سے ملاقات کی باضابطہ ..

کابل(اُردو پوائنٹ اخبارتازہ ترین - آئی این پی۔ 24 جنوری2018ء) افغان طالبان نے قطر آفس کے اعلی سطحی وفد کی اسلام آباد میں پاکستانی حکام سے ملاقات کی باضابطہ تصدیق کردی ۔بدھ کو افغان خبررساں ادارے ’’خاما پریس ‘‘ کی رپورٹ کے مطابق طالبان گروپ نے باضابطہ طور پر گروپ کے قطر کے وفد کی اسلام آباد میں پاکستانی حکام سے ملاقات کی تصدیق کردی ہے ۔

ایک بیان میں طالبان کی طرف سے کہا گیا ہے کہ طالبان رہنمائوں کے پانچ رکنی وفد نے امن مذاکرات کو دوبارہ شروع کرنے کیلئے پاکستانی حکام سے ملاقات کیلئے اسلام آباد کا دورہ کیا ۔بیان میں مزید کہا گہا ہے کہ گروپ ملک میں جاری تشدد کو بات چیت کے ذریعے ختم کرنے کا خواہاں ہے تاہم اس بارے میں مزید تفصیلات فراہم نہیں کی گئی ۔

(جاری ہے)

اس سے قبل میڈیا رپورٹس میں کہا گیا تھاکہ انٹرا افغان امن مذاکرات کے حوالے سے افغان طالبان پر مشتمل اعلی سطح کے وفد نے اسلام آباد کا دورہ کیا تاہم یہ دورہ کسی منطقی انجام تک پہنچے بغیر ہی ختم ہو گیا۔

قطر میں قائم طالبان کے دفتر سے آنے والے وفد میں طالبان کے دیگر رہنمائوں کے ہمراہ شباب الدین دلاور اور مولوی رسول بھی شامل تھے۔ذرائع کے مطابق مذاکرات کے نئے دور کے آغاز پر بھی طالبان کا وہی موقف رہا جو ماضی میں تھا اس لیے اجلاس نتیجہ خیز ثابت نہیں ہوا۔یاد رہے کہ افغانستان میں امن کے لیے طالبان کو مذاکرات کی میز پر لانے اور انہیں سیاسی دھارے میں شامل کرنے سے متعلق مذاکرات کئی عرصے سے تعطل کا شکار ہیں۔