ٹھوس شواہد کی بنیاد پر خواجہ آصف کی نااہلی یقینی ہے ،ْعمران خان

بدھ 24 جنوری 2018 15:22

ٹھوس شواہد کی بنیاد پر خواجہ آصف کی نااہلی یقینی ہے ،ْعمران خان
اسلام آباد(اُردو پوائنٹ اخبارتازہ ترین - این این آئی۔ 24 جنوری2018ء)پاکستان تحریک انصاف کے چیئر مین عمران خان نے کہا ہے کہ ٹھوس شواہد کی بنیاد پر خواجہ آصف کی نااہلی یقینی ہے۔

(جاری ہے)

بدھ کو پی ٹی آئی رہنما عثما ن ڈار نے چیئرمین تحریک انصاف عمران خان سے ملاقات کی جس میں عثمان ڈار نے خواجہ آصف نااہلی کیس کی سماعت سے قبل اہم پیش رفت سے آگاہ کرتے ہوئے کہا کہ خواجہ آصف کے غیر ملکی اکاؤنٹ میں کروڑوں روپے منتقل ہونے کا انکشاف ہوا ،ْ خواجہ آصف نے ان بے نامی ٹرانزیکشنز کے ذریعے منی لانڈرنگ کی جس کیلئے اہلیہ کے اکائونٹس بھی استعمال ہوئے۔

عثمان ڈار نے عمران خان کو بتایا کہ خواجہ آصف نے نواز شریف کا فرنٹ مین بن کرمنی لانڈرنگ کی جس کے نا قابل تردید دستاویزی شواہد سامنے آئے ہیں اور پی ٹی آئی نے حاصل شدہ دستاویزات میڈیا کو جاری کردی ہیں۔چیئرمین تحریک انصاف عمران خان نے کیس کو منطقی انجام تک پہنچانے کی ہدایت کرتے ہوئے کہا کہ ٹھوس شواہد کی بنیاد پر خواجہ آصف کی نااہلی یقینی ہے، تمام دستاویزی شواہد عدالت کے روبرو پیش کیے جائیں۔