حج پالیسی میں 70فیصد سے زائدسرکاری کوٹہ مختص کرنے کیلئے بیلٹنگ روکنے کی متفرق درخواستوں پر وفاقی حکومت ،وزارت مذہبی امور کو نوٹس جاری

پرائیویٹ ٹور آپریٹرز کا کم کوٹہ مختص کرنے کیخلاف کیس زیر سماعت ، بیلٹنگ مکمل ہوئی تو بعد میں شہریوں کی حق تلفی ہو گی‘ درخواست گزاروں کا موقف

بدھ 24 جنوری 2018 15:06

حج پالیسی میں 70فیصد سے زائدسرکاری کوٹہ مختص کرنے کیلئے بیلٹنگ روکنے ..

لاہور (اُردو پوائنٹ اخبارتازہ ترین - این این آئی۔ 24 جنوری2018ء) لاہور ہائیکورٹ نے حج پالیسی میں 70فیصد سے زائدسرکاری کوٹہ مختص کرنے کیلئے بیلٹنگ روکنے کی متفرق درخواستوں پر وفاقی حکومت اور وزارت مذہبی امور کو نوٹس جاری کرتے ہوئے جواب طلب کر لیا ۔گزشتہ روز لاہور ہائیکورٹ کے مسٹر جسٹس شاہد کریم نے ٹریول چینل پرائیویٹ لمیٹڈ سمیت دیگر کی متفرق درخواستوں پر سماعت کی ۔

درخواست گزاروں کی جانب سے موقف اختیار کیا گیا کہ حج پالیسی میں پرائیویٹ ٹور آپریٹرز کا کم کوٹہ مختص کرنے کے خلاف کیس ہائیکورٹ میں زیر سماعت ہے، کیس عدالت میں زیر سماعت ہونے کے باوجود حکومت 70فیصد سرکاری کوٹے کیلئے بیلٹنگ کروانے جا رہی ہے، اگر 70فیصد سے زائدسرکاری کوٹہ مختص کرنے کیلئے بیلٹنگ مکمل ہوئی تو بعد میں شہریوں کی حق تلفی ہو گی،موجودہ حکومت کی پالیسیوں سے اگلی حکومت کو حج کروانے میں مشکلات ہوں گی ۔

(جاری ہے)

لہٰذا معزز عدالت سے استدعا ہے کہ 26جنوری کو حج پالیسی 2018ء کے تحت سرکاری کوٹہ پچاس فیصد سے زیادہ کرنے کیلئے بیلٹنگ روکی جائے۔ جس پر فاضل عدالت نے حج پالیسی میں 70فیصد سے زائدسرکاری کوٹہ مختص کرنے کیلئے بیلٹنگ روکنے کی متفرق درخواستوں پر وفاقی حکومت اور وزارت مذہبی امور کو نوٹس جاری کرتے ہوئے آج جواب طلب کر لیا ۔