وزیراعظم شاہد خاقان عباسی عالمی اقتصادی فورم کے سالانہ اجلاس میں شرکت کیلئے زیورخ پہنچ گئے،کئی اہم تقریبات میں شرکت اور عالمی رہنمائوں سمیت امریکا، یورپ،

زیورخ ۔ (اُردو پوائنٹ اخبارتازہ ترین - اے پی پی۔ 23 جنوری2018ء) وزیراعظم شاہد خاقان عباسی سوئٹزرلینڈ میںعالمی اقتصادی فورم کے سالانہ اجلاس میں شرکت کیلئے زیورخ پہنچ گئے۔ عالمی اقتصادی فورم کا سالانہ اجلاس 24 اور 25 جنوری کو ڈیووس۔کلوسٹرز، سوئٹزرلینڈ میں منعقد ہو رہا ہے، انہیں اس دورے کے دعوت عالمی اقتصادی فورم کے بانی اور ایگزیکٹو چیئرمین پروفیسر کلاس شواب نے دی ہے۔

وزیراعظم اپنے اس دورے میں کئی اہم تقریبات میں شرکت کریں گے اور عالمی رہنمائوں سمیت امریکا، یورپ، چین اور جاپان کی15 ممتاز ملٹی نیشنل کمپنیوں کے سربراہان سے ملاقاتیں کریں گے۔ ترجمان دفتر خارجہ کی طرف سے جاری بیان کے مطابق وزیر اعظم عالمی اقتصادی رہنمائوں کے غیر رسمی گروپ کی خصوصی نشست میں سربراہان مملکت و حکومت سے بھی ملیں گے۔

(جاری ہے)

وہ 24جنوری کو ’’بیلٹ اینڈ روڈ کے اثرات‘‘ کے موضوع پر عالمی اقتصادی فورم کے اجلاس میں بھی شریک ہوں گے۔ وزیر اعظم شاہد خاقان عباسی وال سٹریٹ جرنل، نکی/ ایف ٹی گروپ ، واشنگٹن پوسٹ ، سی این این اور رائٹر سمیت بڑے بین الاقوامی میڈیا اداروں کو انٹرویوز بھی دیں گے۔ عالمی اقتصادی فورم کے سالانہ اجلاس میں وزیراعظم کی شرکت کاروبار ، سرمایہ کاری اور تجارت کے لئے پاکستان کو ایک اہم مقام کے طورپر اجاگر کرنے کا موقع فراہم کرے گی اور پاکستان کی ترقی کرتی ہوئی معیشت کو نمایاں کیا جا سکے گا۔ یہ غیر رسمی نشستوں میں کئی عالمی رہنمائوں سے ملاقات اور مختلف امور پر تبادلہ خیال کا اہم موقع بھی ہو گا۔