انکاؤنٹر اسپیشلسٹ راؤ انوار آصف علی زرداری کے لاڈلے ہیں ، آصف علی زرداری یہ لاڈلا پن ختم کریں،خرم شیر زمان

اس سے قبل کہ راؤ انوار فرار ہوں ،فوری طور پر انہیں گرفتار کیا جائے۔راؤ انوار گنتی پوری کرنے کے لیے جعلی مقابلے کرتے تھے

منگل 23 جنوری 2018 22:24

انکاؤنٹر اسپیشلسٹ راؤ انوار آصف علی زرداری کے لاڈلے ہیں ، آصف علی ..

کراچی (اُردو پوائنٹ اخبارتازہ ترین - این این آئی۔ 23 جنوری2018ء) سندھ اسمبلی میں پاکستان تحریک انصاف کے پارلیمانی لیڈر اور کراچی ڈویژن کے جنرل سیکریٹری خرم شیرزمان نے کہا ہے کہ انکاؤنٹر اسپیشلسٹ راؤ انوار آصف علی زرداری کے لاڈلے ہیں اور آصف زرداری کو واضح پیغام دے رہا ہوں کہ وہ اس لاڈلے پن کو ختم کریں۔ ان خیالات کا اظہار انہوں نے گزشتہ روز نقیب اللہ محسود کے والدین سے اظہار تعزیت کے بعد میڈیا سے گفتگو کرتے ہوئے کیا۔

خرم شیرزمان نے کہا کہ ہمیں تحقیقاتی ٹیم پر مکمل بھروسہ ہے اور اس سے قبل کہ راؤ انوار فرار ہوں ،فوری طور پر انہیں گرفتار کیا جائے۔انہوں نے کہا کہ نقیب محسود سمیت تمام ماورائے عدالت قتل کی تحقیقات کے لئے جلد سے جلد کمیشن بھی بٹھایا جائے کیونکہ ہمارے شہر میں مسلسل ایسے واقعات ہو رہے ہیں۔

(جاری ہے)

پہلے انتظار ،پھرنقیب اور پتہ نہیں کتنے بے گناہوں کو پولیس نے جعلی مقابلے میں مارا ہے۔

پی ٹی آئی کے رہنما کا کہنا تھاکہ راؤ انوار گنتی پوری کرنے کے لیے جعلی مقابلے کرتے تھے ۔تحریک انصاف پہلے بھی عوامی مسائل اسمبلی میں اُٹھا چکی ہے اور آگے بھی اُٹھاتی رہے گی۔خرم شیر زمان کا کہنا تھاکہ پولیس کی ذمہ داری ہے کہ جن افراد کو اٹھایاجائے، ان کے ورثا کو بتایا جائے اورنقیب اللہ کے کیس کو ٹیسٹ کیس بنایا جائے۔