ایوان بالا کی پولیو کے خلاف حکومتی مہم کی تعریف

اسلام آباد ۔ (اُردو پوائنٹ اخبارتازہ ترین - اے پی پی۔ 22 جنوری2018ء) ایوان بالا نے پولیو کے خلاف حکومت کی مہم کو سراہتے ہوئے کہا ہے کہ اس معاملے پر مزید توجہ مرکوز کرنے کی ضرورت ہے جبکہ پولیو کے خلاف پروگرام کی فوکل پرسن عائشہ رضا نے کہا ہے کہ ہم نے سب کو ساتھ ملا کر اس پروگرام کو کامیاب بنایا ہے۔ پیر کو ایوان بالا میں سینیٹر اعظم سواتی نے تحریک پیش کی کہ پولیو وائرس کی موجودہ صورتحال کو زیر بحث لایا جائے۔

انہوں نے کہا کہ یہ بہت اہم معاملہ ہے۔ اس پر مزید توجہ کی ضرورت ہے اگرچہ حکومت پہلے ہی اس معاملے میں کافی اقدامات کر رہی ہے جس کو میں سراہتا ہوں۔ سینیٹر میر کبیر شاہی نے کہا کہ بلوچستان اور کے پی کے میں پولیو ورکرز اپنی جان پر کھیل پر اپنا مشن انجام دے رہے ہیں جن کو سراہتے ہیں۔

(جاری ہے)

افغانستان سے پولیو کے وائرس یہاں آتے ہیں حالانکہ کہا جاتا ہے کہ افغانستان پولیو فری ہے۔

سعود مجید نے کہا کہ سائرہ افضل تارڑ اور عائشہ رضا فاروق نے پولیو کے خلاف بڑا کردار ادا کیا ہے اور قومی خدمت سرانجام دی ہے۔ چیئرمین نے بھی سینیٹر عائشہ رضا کے کام کو سراہا۔ پولیو کے خلاف پروگرام کی فوکل پرسن سینیٹر عائشہ رضا نے چیئرمین اور ارکان کا شکریہ ادا کیا اور کہا کہ بدقسمتی سے پاکستان ان تین ملکوں میں ہے جہاں پولیو وائرس ہے لیکن ہم نے اس حوالے سے بہت کام کیا ہے۔ پولیو کے خلاف پاکستان آرمی، پولیس، ایف سی، تمام سیاسی حکومتوں، انتظامیہ اور سب نے مل کر کام کیا ہے اس لئے کامیابی کا کریڈٹ سب کو جاتا ہے۔ ہم نے علماء، میڈیا، سول سوسائٹی، سب کو ساتھ ملا کر کام کیا ہے اور گزشتہ سال سب سے کم کیس ریکارڈ کئے گئے جن کی تعداد 8 ہے۔ اس معاملے پر سب جماعتیں متحد ہیں۔